Taldyqorǵanda egde jastaǵy áieldi tonaǵan urynyń qylmysy beinejazbaǵa túsip qaldy, dep habarlaidy "Ult aqparat".
Almaty oblystyq Politsiia departamenti baspasóz qyzmetiniń málimetinshe, Taldyqorǵan qalasy PB Batys politsiia bóliminiń kezekshi bólimine 66 jastaǵy jergilikti turǵyn tonalǵanyn aityp aryzdanǵan. «Jastar» shaǵyn aýdanynda belgisiz er adam áielden ámiiany, 85 000 teńgeden astam aqshasy, bank kartochkasy, jeke kýáligi jáne zeinetaqy kýáligi bar sómkesin alyp ketken. Atalǵan derek QR QK 191-babynyń 1-bóligi boiynsha SDTBT-de tirkeldi.
Kúdikti aqshany alyp, sómkeni, ámiiandy jáne qujattardy qylmys ornyna jaqyn jerge laqtyryp jibergen.
Tártip saqshylary jedel túrde kúdiktiniń turǵan jerin anyqtap, ony ortalyq saiabaq aýmaǵynan ustady. Ustalǵan azamat oblys ortalyǵynyń esh jerde jumys istemeitin 19 jastaǵy turǵyny bolyp shyqty.
Qaraqshylyq deregi túsip qalǵan beinejazba men basqa da dáleldemeler usynylǵannan keiin, ol aqshany óziniń jeke qajettilikterine jumsaǵanyn jetkizip, qylmys jasaǵanyn moiyndady.
Tergeý barysynda ol sómkeni, ámiiandy jáne qujattardy tastaǵan jerlerdi kórsetti.
Kúdikti QR QIJK 128-babyna sáikes ýaqytsha ustaý oqshaýlaǵyshyna qamaqqa alyndy. Ózge aqparat tergeý múddesine sai jariia etilmeidi.
