Foto: pixabay
Taldyqorǵanda 3 jasar balany uryp óltirgen 24 jastaǵy turǵyn 10 jylǵa sottaldy, dep habarlaidy QazAqparat agenttigi.
«Kináni jeńildetetin mán-jaǵdailardy, iaǵni sottalýshynyń buryn sotty bolmaǵandyǵyn, shyn júrekten ókinýin, jábirlenýshiniń ony keshirýin jáne kináni aýyrlatatyn mán-jailardyń joqtyǵyn eskere otyryp, sot sottalýshyǵa 10 jylǵa bas bostandyǵynan aiyrý jazasyn taǵaiyndady. Jazany qylmystyq-atqarý júiesiniń ortasha qaýipsiz mekemesinde óteý belgilendi», - dedi Jetisý oblystyq soty baspasóz qyzmetiniń ókili Nursultan Orynbasarov.
Esterińizge sala keteiik, 2022 jylǵy qyrkúiekte Taldyqorǵandaǵy aýrýhananyń birinde 3 jasar bala kóz jumdy. Dárigerler balaǵa bas jaraqaty diagnozyn qoiǵan.
Sábi ólimine qatysy bar degen kúdikpen osy balany qarap-baqqan 23 jastaǵy jergilikti turǵyn ustaldy. Qyz ÝUI-ǵa qamaldy, biraq qalalyq sot kúdiktige «úi qamaǵy» sanktsiiasyn berdi. Alaida, kúdikti keiin qaita qamaýǵa alyndy.
«Úiqamaqqa jiberilgen kúdikti buǵan deiin sottalmaǵan, kinásin tolyq moiyndaǵan, tergeýden qashpaǵan, turǵylyqty jeri bolǵan. Osyny negizge alyp, sot ony úiqamaqqa jibergen. Bul jerde biz sottyń sheshimin zańsyz dep sanamaimyz, biraq negizsiz dep sanaimyz. Sol sebepti, qylmys aýyr sanatqa jatatyndyqtan, kúdikti qoǵam úshin qaýipti bolýy múmkin. Soǵan sáikes, biz prokýratýra tarapynan sottyń kúdiktini úiqamaqqa jibergen sheshimimen kelispei, qaita kúdiktini qamaýǵa alý jóninde ótinish hat joldadyq. Sot bizdiń ótinishimizdi qanaǵattandyryp, kúdiktini qaita qamaýǵa alý jóninde sheshim shyǵardy», - degen edi qala prokýrory Baqytjan Asheev.
Atalǵan fakti boiynsha saraptama taǵaiyndala otyryp, tergeý QR QK 106-baby 3-bóligi (abaisyzda jábirlenýshiniń ólimine ákep soqqan densaýlyqqa qasaqana aýyr ziian keltirý) negizinde júrgizildi.
