Foto: Viktor Fediýnin/ Kazinform
Jetisý oblysynyń ortalyǵy Taldyqorǵandy jańa jyldyq bezendirýge biyl jergilikti biýdjetten 35 960 341 teńge bólingen. Merekege daiyndyq jumystary 17- shi jeltoqsanda bastalyp, 23-ine deiin aiaqtalady dep josparlanyp otyr, dep habarlaidy Ult.kz Kazinform-ǵa silteme jasap.
Jeltoqsan aiynyń orta sheninde elimizdegi óńirlerdiń bári jyldaǵy dástúrge sai jańa jyldyń qamyna kirisetini anyq. Ortalyq alańdarǵa shyrshalar ornatylyp, qala ishinde túrli- tústi shamdar jaǵylady. Sanaýly kúnder ǵana sán- saltanaty asyp turatyn bezendirýlerge biýdjettiń búiirin solqyldatyp, milliondar jumsalady. Jetisý oblysynyń ortalyǵy Taldyqorǵan qalasyna biyl jańa shyrshalar alynbaidy. Esesine qoldanysta bar 3 shyrshaǵa ilinetin shamdar (kýpol) men barlyq bezendirý jumysyna 19 129 230 teńge bólingen.
— Jańa jyldyq jańa shaǵyn sáýlet nysandaryn jasatýǵa 12 124 000 teńge bólindi. Byltyrdan qalǵan 30 danasyn qalpyna keltirdik. Onyń somasy 4 707 111 teńgege shyqty. Bezendirý ortalyq alańnan bólek, «Jastar» saiabaǵy men «Bereke» kottedj qalashyǵyna, qala mańyndaǵy Ótenai men Erkin aýyldyq okrýgterine de júrgiziledi, — dedi Taldyqorǵan qalalyq ákimdiginiń baspasóz qyzmeti.
Aita keteiik 2022 jyly qala ákimidigi quny 3 mlnnan asatyn 3 shyrsha (9 871 000 teńge) satyp alǵanyn málimdegen bolatyn. Sol jyly jańa jyldyq bezendirýge 36,5 mln teńge bólingen edi. Qala turǵyndarynyń keibiri mundai sharalarǵa jyl saiyn aqsha jumsaǵansha qalanyń kem- ketigin toltyrsa degendi aitady.
— Menińshe miliiondardy shyrsha men shamdarǵa jumsaǵansha qaladaǵy kóp máselerdi sheship, solarǵa berse. Kópqabatty úide turamyz. Úiimiz sýyq. Taldyqorǵanda qoqys máselesi ózekti. Qala mańynda múlde jaryq joq kósheler bar. Solardy jaǵyp bersin. Shyrsha kóp bolsa 10-15 kún ǵana turady. Al, máselemiz jyldar boiy sheshilmeidi, -deidi qala turǵyny Baljan Baitoqova.
Eske salaiyq osyǵan deiin Aqtóbede Jańa jyl merekesine orai qalany bezendirýge qarjy bólinbeitinin jazǵanbyz.
