Elordanyń Taldykól kóli aýmaǵynda demalys aimaǵy salynady. Bul týraly Nur-Sultan qalasy Esil aýdanynyń ákimi Berik Jákenov aitty, dep habarlaidy QazAqparat.
«Taldykólge qatysty investitsiialyq baǵdarlama bar. Ony abattandyryp, demalys aimaǵyn jasaimyz. Ol óte tartymdy jerge ainalady. Bul investitsiialyq turǵyda tartymdy joba bolǵandyqtan investorlarmen birge barlyǵyn tyńǵylyqty qarastyrý qajet. Tolyqtai alǵanda atalǵan aýdandy damytýǵa qatysty naqty paiymymyz bar», - dedi aýdan ákimi Facebook-tegi Astananyń adaldyq alańy paraqshasynda ótken onlain brifing barysynda.
Eske salaiyq, Taldykól 1970 jyldan beri sarqyndy sýlardy jinaqtaǵysh bolyp tabylady. Udaiy aǵyp turatyn sarqyndy sýlar onyń tabiǵi jaǵasyn shaiyp ketken. 1969 jyly kóldiń ainalasyna jasandy bóget salynyp, ol Tselinograd qalasynyń kárizdik tazartý qurylystarynyń bir bóligine ainaldy. Búginde Taldykól áli de Astana qalasynyń tazartylǵan sarqyndy sýlaryn akkýmýliatsiialaýǵa arnalǵan syiymdylyq bolyp tabylady. Onyń kólemi 65,5 million tekshe metr sýdy quraidy.
2017 jyly «Taldykól» sý jinaqtaǵyshyn joiýdy aiaqtap, tazalaý qurylǵysy tolyq iske qosyldy. Sý tazalanǵannan keiin «Nura-Esil» arnasy arqyly Esil ózenine quiylady.
