Ulttyq biryńǵai testileýdiń birinshi múmkindiginde ereje buzǵan talapker ekinshisine jiberilmeidi. Bul týraly QR BǴM Joǵary jáne joǵary oqý ornynan keiingi bilim departamenti direktory Ádilet Toibaev aitty, dep habarlaidy QazAqparat.
«Biyl Ulttyq biryńǵai test tapsyrýǵa eki ret múmkindik berildi. Biraq, osy eki múmkindikte talapkerler beiindi pánderdi aýystyra almaidy. Eger, birinshi múmkindikte «matematika+fizika» tapsyrsa, demek, ekinshi múmkindiginde de týra osy «matematika+fizika» pánderin tapsyrýǵa mindetti. Osy jylǵy UBT-nyń taǵy bir ereksheligi - birinshi múmkindikte ereje buzǵan jaǵdaida nátijeleri joiylady jáne ekinshi ret tapsyrýǵa jol berilmeidi. Al eger talapker birinshi múmkindiginde sátti ótip, ekinshi múmkindiginde belgili bir erejeni buzsa, onda eki múmkindiginiń de nátijesi joiylady ári granttyq konkrýsqa qatysa almaidy. Sondyqtan árbir talapkerdi akaedmiialyq adaldyq ustanýǵa shaqyramyz», - dedi departament direktory Ortalyq kommýnikatsiialar qyzmetindegi baspasóz máslihatynda.
Onyń atap ótýinshe, biyl tek quqyq baǵyty boiynsha ǵana shekti ball 70-ke kóterilip otyr.
«Erekshe bilim berý qajettilikteri bar balalarǵa qosymsha 40 minýt beriledi. Sonymen qatar olarǵa arnalǵan testerdiń sapasy da, qurylymy da ózgerdi. Taǵy bir jańashyldyq akademiialyq adaldyqty saqtaý maqsatynda testilenýshilerdiń test nusqasy tańbalanatyn bolady. Demek, árbir test tapsyrýshynyń jeke test nusqasy bolady jáne tańbalanady. Aqparattyq qaýipsizdik maqsatynda testileý «1 kompiýter – 2 kamera – 1 testilenýshi» qaǵidaty boiynsha júrgiziledi», - dedi Ádilet Toibaev.
