15 maýsymda Taraz qalasyndaǵy kópbeiindi qalalyq aýrýhanada 18-50 jas aralyǵyndaǵy eriktilerdiń qatysýymen BQPǴZI ǵalymdary ázirlegen QazCoVac-P sýbbirlikti vaktsinasynyń klinikalyq zertteýleriniń 1 fazasy bastaldy, dep habarlaidy "Ult aqparat".
Bilim jáne ǵylym ministrligi Ǵylym komitetiniń «Biologiialyq qaýipsizdik problemalarynyń ǵylymi-zertteý institýty» ShJQ RMK COVID-19-dyń aldyn alýǵa arnalǵan jańa vaktsinalyq preparat – SARS-CoV-2 koronavirýsynyń jasandy sintezdelgen aqýyzdary negizinde QazCoVac-P sýbbirlikti vaktsinasynyń klinikalyq zertteýleriniń I jáne II fazasyn júrgizýge QR Densaýlyq saqtaý ministrliginiń ruqsatyn aldy.
Molekýlalyq biologiianyń zamanaýi tehnologiialaryn qoldanýdyń arqasynda, ázirleýshiler, SARS-CoV-2 koronavirýsynyń immýndyq júiemen tanylatyn RBD jáne N aqýyzdaryn óndiretin bakteriialardyń shtamdaryn ala aldy.
Vaktsinanyń qaýipsizdigin qamtamasyz etý úshin alynǵan aqýyzdardy kúrdeli tazartýdyń barlyq kezeńderi júrgizildi jáne sapa baqylaýy ótkizildi. Olardyń quramynda tutas virýs joq.
Ataýly vaktsina, QR DSM mamandandyrylǵan kásipornynda klinikaǵa deiingi synaqtardan sátti ótken jáne óziniń qaýipsizdigin kórsetken BQPǴZI-ynyń ekinshi vaktsinasy bolyp tabylady. Vaktsina, ekinshi dozany bulshyqet ishine engizgennen keiingi 14-shi táýlikte egilgen zerthanalyq janýarlardyń aǵzasynda immýnitetti damytýǵa sebepshi bolady.
Sýbbirlikti vaktsina vaktsinalardyń basqa túrlerine qaraǵanda edáýir qaýipsiz, óitkeni quramynda virýs joq jáne aqýyz túrindegi naqty komponentteri replikatsiialanbaidy. Vaktsinanyń quramyndaǵy adiývant immýndyq jaýaptyń paida bolýyna sebepshi bolady jáne vaktsinatsiialanýshynyń aǵzasyna teris áser etpeidi. Vaktsinanyń bul túriniń mysaldary retinde tumaýǵa, V gepatitine, pnevmokokqa, meningokokkqa, gemofildi infektsiialarǵa jáne t.b. qarsy vaktsinalardy alýǵa bolady.
Klinikalyq zertteýlerdiń sátti ótýi sýbbirlikti vaktsina kómegimen vaktsinatsiialanǵandardyń kontingentin keńeitýge jáne elimizde koronavirýsqa qarsy ujymdyq immýnitettiń qalyptasýyn tezdetýge múmkindik beredi.
