QR Eńbek jáne halyqty áleýmettik qorǵaý ministri Serik Shápkenov halyqqa esep berý kezdesýinde tabysy az otbasylardy áleýmettik qoldaý sharalary týraly aityp berdi, dep habarlaidy "Ult aqparat".
Eńbek ministrliginiń basshysy 2020 jyldan bastap Qazaqstanda ashyqtyqty, ádildikti jáne ózara jaýapkershilikti kúsheitý qaǵidattaryna negizdelgen ataýly áleýmettik kómek (AÁK) kórsetýdiń jańa modeli iske asyrylyp jatqanyn atap ótti (toqsan saiynǵy ótinish, taǵaiyndaý kriteriii – otbasynyń árbir múshesine shaqqandaǵy ortasha tabystyń óńirlik eń tómengi kúnkóris deńgeiiniń 70%-ynan kem mólsheri, balalarǵa arnalǵan tirkelgen tólemniń kúshi joiyldy, eńbekke qabiletti adam jumysqa ornalasýdan bas tartqan jaǵdaida barlyq otbasy AÁK alý quqyǵynan aiyrylady).
AÁK kórsetýdiń jańa tásilderin engizý sheńberinde 4 jáne odan da kóp balalary bar kópbalaly otbasylarǵa beriletin járdemaqy engizildi jáne tabysy az otbasylardyń balalary úshin kepildik berilgen áleýmettik toptama (áleýmettik toptama) engizildi.
Balalardyń jasyna bailanysty mektep jasyna deiingi balalar men mektep oqýshylaryna arnalǵan áleýmettik toptamanyń eki túri bar. Mektep jasyna deiingi balalarǵa balalar taǵamy jáne gigienalyq kerek-jaraqtar, mektep jasyndaǵy balalarǵa mektepte ystyq tamaq, mektep kiimi men kerek-jaraqtary, jol júrý shyǵystaryn óteý usynylady. Áleýmettik toptama quramyn qalyptastyrý kezinde densaýlyq saqtaý, bilim berý mamandarynyń usynymdary, jurtshylyqtyń pikiri eskerildi. 2020 jyly 435 myń bala áleýmettik toptama aldy.
«2020 jyly barlyǵy 936 myńnan astam adam nemese tabysy az 185 myń otbasy, onyń ishinde 600 myń bala (64%), 73,5 myń kópbalaly otbasy AÁK aldy. Tólemderdiń jalpy somasy 88 mlrd teńgeni qurady», – dedi Serik Shápkenov.
Eńbekke qabiletti kómek alýshylardy jumyspen qamtýǵa erekshe nazar aýdaryldy.
«Jumyspen qamtýǵa járdemdesýdiń belsendi sharalaryna 201 myń adam nemese eńbekke qabiletti AÁK alýshylardyń 74%-y (271 myń) tartyldy. 1,4 myń otbasy óz isin damytý úshin jeńildetilgen mikrokredit aldy», – dedi ministr.
Ol sondai-aq, 2020 jyly barlyq óńirlerde tabysy az jáne kópbalaly otbasylardy túrli máseleler boiynsha qoldaý ortalyqtary ashylǵanyn atap ótti (31 ortalyqta AÁK taǵaiyndaý, turǵyn úi, jumysqa ornalastyrý, kásipkerlikti damytý jáne t.b. máseleler boiynsha kómek jáne keńes beriledi).
«AÁK-ti odan ári jetildirý maqsatynda jáne alýshylarǵa yńǵaily bolý úshin biz zamanaýi tsifrlyq sheshimderdi engizýdi jalǵastyramyz. Máselen, 2021 jyldan bastap AÁK-ke ótinishti Elektrondyq úkimet portaly arqyly berýge bolady. Balalarǵa arnalǵan áleýmettik toptama Áleýmettik qyzmetter portalyna aýystyrylady. Jańa «Eńbek» ulttyq jobasy aiasynda eńbekke qabiletti áleýmettik kómek alýshylardyń tabysyn arttyrý úshin jumysqa ornalastyrý, suranysqa ie mamandyqtarǵa oqytý, óz isin ashý nemese damytý úshin jeńildikti mikrokreditter men granttar berý boiynsha keshendi sharalar usynylatyn bolady», – dep túiindedi Eńbekmininiń basshysy.
