Biylǵy Joldaýdan Memleket basshysynyń eldegi árbir jaittan habardar bolyp otyrǵanyn bilýge bolady. Mundai pikirdi PhD doktoranty Ainur Turalyqyzy bildirdi, dep habarlaidy QazAqparat.
«Prezident Qasym-Jomart Toqaev «Jańa jaǵdaidaǵy Qazaqstan: is-qimyl kezeńi» atty Qazaqstan halqyna Joldaýyn qazirgi jahandyq qiyn jaǵdaida sabyr saqtap, pandemiiany jeńýge kúsh salǵan halyqqa alǵysymen bastady. Kún-tún demei eńbek etken dárigerlerge, quqyq qorǵaý organdarynyń qyzmetkerlerine, eriktilerge, basqa da azamattarǵa rahmetin aityp, olardyń airyqsha tabandylyqtyń jáne zor jaýapkershiliktiń jarqyn úlgisin kórsetkenderin jetkizdi. Budan Memleket basshysynyń árbir jaittan habardar bolyp otyrǵanyn bilýge bolady», - dedi ol.
Jas ǵalymnyń paiymynsha, el basqarý, halyqtyń kóńilinen shyǵý ońai is emes ekeni belgili. Qarapaiym halyqtyń únin estip, áleýmettik, ekonomikalyq máselelerdi sheshýden basqa, shym-shytyryq syrtqy ister de jetip artylady. Kórshiles jatqan alyp memlekettermen dostyq qarym-qatynas ornatyp, elimizde tynyshtyq pen beibitshiliktiń ornaýyn qamtamasyz etý árkimniń qolynan kele bermesi anyq.
«Mine, Memleket basshysy bul joly da birqatar problemany kóterip, onyń sheshimin tabýǵa tyrysýda. Ásirese, men úshin kókeide júrgen nárse – «Jasyl» ekonomikany damytý, qorshaǵan ortany qorǵaý máselesi alǵa qoiyldy. Bul problema búgingi kúnniń «jarasyna» ainalǵan. Elimizdegi ádemi, erekshe tabiǵatymen kózge túsken jerlerdiń qorǵaýsyz, jan-janýarlarymyzdyń «tepkige» qalǵany belgili. Mektepter men joǵary oqý oryndarynda ekologiialyq tárbie jumystary da bastalyp ketken bolatyn. Bilim alýshylardyń ekologiialyq mádeniet, ekologiialyq bilim jáne tárbie deńgeiin arttyrý úshin úzdiksiz bilim berýdiń keshendi modeli engiziletin bolady, dep otyr Bilim jáne ǵylym ministrligi de. Taǵy bir másele – balalardyń qaýipsizdigi men quqyǵyn qorǵaý kóterildi. Qoǵam ózgerip, burynǵy minez-qulyq normalary quldyraýǵa ushyrap, jasóspirimder arasynda deviantty minez-qulyq máselesi ózekti bolyp otyr. Sondyqtan quqyǵy qorǵalmaǵan, ar-namysy taptalǵan balanyń júikesi tozyp, minez-qulqynyń ózgeriske ushyraityny aitpasa da túsinikti. Keleńsiz jaittardyń, jat qylyqtyń aldyn alý – memleket aldyndaǵy basty maqsat. «Jalpy, bizge áleýmettik saiasattyń jańa paradigmasy kerek», – dep naqtylady Prezident. Sóitip Úkimetke elimizdiń Áleýmettik kodeksin ázirleý jumysyn bastaý tapsyryldy», - deidi PhD doktoranty.
Sonymen qatar, Ainur Turalyqyzy Joldaýda bilim sapasyn jetildirip, ǵylym salasyn damytý máselesi de tilge tiek etilgenin, ásirese, ǵylymdy qarjylandyrýdyń jáne qoldaýdyń mańyzdy kózi – iri kásiporyndardyń, ásirese shikizat salasyndaǵy kompaniialardyń qarajaty ekeni aitylǵanyn atap ótedi.
«Tapqan tabystyń 1 paiyzynyń ǵylym men tehnologiiany damytýǵa jumsaýǵa tiisti talaptardyń saqtalmai otyrǵanyn jetkizgen Memleket basshysy Úkimetke osy qarajatty jinaqtaý isin ortalyqtandyrýdy jáne onyń biýdjet arqyly jalpyulttyq ǵylymi basymdyqqa sai bólinýin qamtamasyz etýdi tapsyrdy. Budan bólek aimaqtaǵy biznes ókilderin joǵary oqý oryndaryndaǵy ǵylymi qyzmetin óz qamqorlyǵyna alyp, qoldaý kórsetýge shaqyrdy. Osy tusta elimizdi ǵylymi-tehnologiialyq turǵydan damytý boiynsha baǵdarlamalyq qujattyń qajettiligin de aityp ketti. Ǵylymi jumystarmen ainalysyp júrgen qyzmetkerler úshin bunyń oń úrdis bolary anyq», - dedi ol.
