Elimizde syilyq alýǵa tyiym salynatyn laýazymdy jáne jaýapty memlekettik laýazymdy tulǵalar tizbesi tolyqtyrylady. Bul týraly QR Sybailas jemqorlyqqa qarsy is-qimyl agenttigi tóraǵasynyń birinshi orynbasary Oljas Bektenov aitty, dep habarlaidy QazAqparat.
Ol búgin Májilistiń jalpy otyrysynda «QR keibir zańnamalyq aktilerine sybailas jemqorlyqqa qarsy is-qimyl máseleleri boiynsha ózgerister men tolyqtyrýlar engizý týraly» zań jobasyn tanystyrǵan bolatyn. Qujatta túzetýlerdiń 3 blogy qarastyrylǵan. Birinshi blok sybailas jemqorlyq kórinisterin júieli túrde aldyn alý boiynsha qosymsha tetikterdi engizýge baǵyttalǵan.
Tóraǵa birinshi orynbasarynyń aitýynsha, túzetýlerdiń ekinshi blogy olqylyqtar men qaishylyqtardy joiýǵa baǵyttalǵan. Ákimshilik quqyq buzý týraly kodekstiń «Ákimshilik sybailas jemqorlyq quqyq buzýshylyqtar» atty taraýynyń 676, 677 jáne 678-baptarynda olardy usynǵan tulǵalardyń paidasyna is-áreketteri úshin materialdyq syiaqy, syilyqtar, jeńildikter ne qyzmetter kórsetýge jáne qabyldaýǵa tyiym salynǵan tulǵalardyń tizbesi laýazymdy tulǵalar men jaýapty memlekettik laýazymdy atqaratyn tulǵalarmen tolyqtyrylýda. «Sybailas jemqorlyqqa qarsy is-qimyl týraly» Zańda sybailas jemqorlyq quqyq buzýshylyq týraly aqparaty bar adamnyń sybailas jemqorlyqqa qarsy is-qimyl jónindegi ýákiletti organdy ǵana emes, sondai-aq óz quzyreti sheginde sybailas jemqorlyq quqyq buzýshylyqtardy anyqtaýdy, jolyn kesýdi, ashýdy, tergeýdi jáne aldyn alýdy júzege asyratyn basqa da memlekettik organdardy habardar ete alatyndyǵy kózdelgen.
«Túzetýlerdiń úshinshi blogy Ulttyq biýronyń Qazaqstan Respýblikasynyń Sybailas jemqorlyqqa qarsy is-qimyl agenttigine qaita qurylýyna, Memlekettik qyzmet isteri jáne sybailas jemqorlyqqa qarsy is-qimyl agenttigi fýnktsiialarynyń sybailas jemqorlyqqa qarsy qyzmetke berilýine bailanysty. Birinshiden, «Sybailas jemqorlyqqa qarsy is-qimyl týraly» Zańda «sybailas jemqorlyqqa qarsy is-qimyl jónindegi ýákiletti organ» uǵymy naqtylandy. Ekinshi, «Sybailas jemqorlyqqa qarsy is-qimyl týraly» Zańǵa sybailas jemqorlyqqa qarsy qyzmettiń mártebesine qatysty redaktsiialyq sipattaǵy túzetýler engizilýde. Úshinshi, Ákimshilik quqyq buzýshylyq týraly kodekste sybailas jemqorlyqqa qarsy qyzmettiń vedomstvolyq baǵynystylyǵyna qatysty baptar naqtylandy. Tórtinshi, «Ulttyq arhiv qory jáne arhivter týraly» Zańda arnaiy memlekettik arhiv qurylatyn memlekettik organdardyń tizbesinde «Memlekettik qyzmet isteri jáne sybailas jemqorlyqqa qarsy is-qimyl agenttiginiń Ulttyq biýrosy» degen sózder «Sybailas jemqorlyqqa qarsy qyzmet» degen sózderge aýystyryldy«, - dedi Oljas Bektenov.
Onyń dereginshe, zań jobasymen 3 Kodekske, 7 Zańǵa túzetýler engizilýde. Zań jobasy múddeli memlekettik organdarmen, Premer-Ministr Keńsesimen, Prezident Ákimshiligimen, «Atameken» ulttyq kásipkerler palatasymen kelisildi. Zań jobasyn qabyldaý teris áleýmettik-ekonomikalyq jáne quqyqtyq saldarǵa, sondai-aq memlekettik biýdjetten shyǵyndarǵa ákep soqpaidy.
