Foto: Akorda.kz
QR Syrtqy ister ministri Murat Nurtileý Túrki memleketteri uiymy syrtqy ister ministrleri keńesiniń otyrysynda Izrail men HAMAS arasyndaǵy atysty dereý toqtatýǵa jáne gýmanitarlyq dálizderdi ashýǵa shaqyrdy, dep habarlaidy Kazinform agenttigi.
«Elderimiz ben halyqtarymyzdyń turaqtylyǵy men órkendeýin qamtamasyz etkimiz kelse, qazirgi geosaiasi týrbýlenttilik pen ekonomikalyq syn-qater bizden TMU sheńberinde kelisilgen kúsh-jigerdi talap etedi. Sondyqtan elimiz Taiaý Shyǵystaǵy zorlyq-zombylyqtyń ýshyǵýyna qatty alańdaidy. Biz halyqaralyq qaýymdastyqpen yntymaqtastyqqa qosylamyz jáne Izrail men HAMAS arasyndaǵy atysty dereý toqtatýǵa shaqyramyz», - dedi Nurtileý Túrki memleketteri uiymy syrtqy ister ministrleri keńesiniń otyrysynda.
Ministrdiń aitýynsha, Gaza halqy úshin gýmanitarlyq dáliz ashý - qazaqstandyq diplomatiianyń birinshi kezektegi mindeti, ol qandai da bir aldyn ala shartsyz oryndalýǵa tiis.
«Qaqtyǵys taraptary Taiaý Shyǵysta ǵana emes, búkil álemdegi turaqtylyq pen qaýipsizdik úshin beibit kelissózge nazar aýdaryp, BUU-nyń tiisti qararlaryna sáikes «Eki halyq úshin eki memleket» formýlasyn qoldaýy kerek. Shynynda da, qazirgi jaǵdai buryn-sońdy bolmaǵan jáne ony esh boljaý múmkin emes. Osyǵan qaramastan Qazaqstan BUU Jarǵysynda jáne halyqaralyq quqyqta bekitilgen qundylyqtar men qaǵidattardy berik ustanyp, teńgerimdi, kópvektorly syrtqy saiasatty júrgizýdi jalǵastyra beredi», - dedi Murat Nurtileý.
Aita keteiik, Astanada Túrki memleketteriniń syrtqy ister ministrleri bas qosty. Otyrys jabyq formatta ótip jatyr.
Sondai-aq búgin elordada Túrki memleketteri uiymynyń (TMU) mereitoilyq H sammiti ótedi. Bul jiynǵa Túrki memleketteri uiymyna múshe Ázerbaijan, Qyrǵyzstan, Túrkiia, Ózbekstan prezidentteri, sondai-aq TMU-daǵy baqylaýshy memleketter – Majarstan men Túrikmenstan basshylary qatysady.
