Astanadaǵy joiqyn órtten keiin eńbek jáne halyqty áleýmettik qorǵaý ministrligi kópbalaly otbasylarǵa kórsetiletin áleýmettik kómekti jetildirýdi kózdep otyr, dep habarlaidy Sputnik Qazaqstan tilshisi.
Eńbek jáne halyqty áleýmettik qorǵaý vitse-ministri Svetlana Jaqypova kópbalaly jáne turmysy tómen otbasylarǵa memleket tarapynan kórsetiletin áleýmettik kómek jetkiliksiz ekenin moiyndady. Ministrlik áleýmettik kómek pen áleýmettik qyzmet kórsetýdi qosymsha jetildirýdi kózdep otyr.
"Tiisinshe, búgingi tańda biz úlken bir jobany júzege asyrmaqpyz. Bul áleýmettik qyzmetter portaly. Endi ata-analarǵa memlekettik organdarǵa júginýdiń qajeti bolmaidy, barlyq áleýmettik kepildikter portalǵa shyǵarylady", - dedi vitse-ministr úkimet kýlýarynda.
Jaqypova kópbalaly analarǵa memleketten tólenetin járdemaqynyń túrleri kóp ekenin atap ótti.
"Qazaqstanda tórt jáne odan kóp balasy bar otbasylar kópbalaly sanalady. Búginde kópbalaly analar memlekettik jádemqy alady, oǵan qosa, eger otbasynyń tabysy kedeilik sheginen tómen bolsa, olarǵa ataýly áleýmettik kómek taǵaiyndalady. "Kúmis alqa", "Altyn alqa" iegerlerine memlekettik járdemaqy tólenedi", - dedi ol.
Jaqypova ministrlik qazirgi tańda kópbalaly otbasylardy qoldaýdy jetildirýdi kózdep otyrǵanyn aitty.
"Buǵan deiin eshqandai shara qabyldanbady dep oilamańyzdar. Ministrdiń tapsyrmasymen byltyr áleýmettik qoldaýdyń tiimdiligi boiynsha sotsiologiialyq zertteý júrgizildi. Sebebi kez kelgen jańashyldyq mindetti túrde naqty málimettermen negizdelgen bolýy tiis", - dedi ol.
Jýrnalister Svetlana Jaqypovadan búgingi úkimet otyrysyna ministr Madina Ábilqasymovanyń nege kelmegenin surady.
"Ministr ótken aptadan beri aýyryp júr. Keshe ózi baryp ata-anasyna kóńil aitty", - dedi orynbasary.
Al ata-analar nege túngi aýysymda jumys isteýi kerek degen saýalǵa "bul olardyń tańdaýy" dep qysqa qaiyrdy.
