Shymkenttik prokýrorlar buǵan deiin uzaq merzimge sottalǵan «Syra koroli» Toqtar Tóleshovten qansha aqsha óndirilgenin jariia etti. Qadaǵalaý organdary ókilderiniń aitýynsha, kúni búginge deiin sottalýshydan memleket paidasyna 1 mlrd 215 mln teńge túsken, dep habarlaidy "Ult aqparat".
Qalalyq prokýratýranyń baspasóz qyzmeti habarlaǵandai, memlekettik sot oryndaýshysy 2017 jyldan beri Toqtar Tóleshovten memleket paidasyna 1 mlrd 400 mln teńge óndirýi kerek bolǵan.
«Is-qujattardy zerdeleý nátijesinde JShS-niń jarǵylyq kapitalyndaǵy aktivteri retinde berilgen boryshker Toqtar Tóleshovke tiesili múlikteri anyqtaldy. Alaida atalǵan múlikterinen óndirýdi uzaq ýaqyttan beri júzege asyra almaǵan. Qala prokýratýrasynyń tikelei aralasýymen memlekettik sot oryndaýshy atalǵan múlikterge baǵalaý júrgizdi. Nátijesinde sottyń uiǵarymy boiynsha olar memleket paidasyna berildi. Atqarý óndirisiniń aiasynda sottalýshyǵa qatysty úkim oryndalyp, jalpy somasy 1 mlrd 215 mln teńgeni quraityn boryshker múlkiniń biýdjetke túsýi qamtamasyz etildi. Sot úkiminiń ári qarai oryndalýy prokýratýranyń baqylaýynda bolady», delingen habarlamada.
Eske salaiyq, el ishinde «Syra koroli» atanyp ketken syra zaýytynyń burynǵy qojaiyny Toqtar Tóleshov 2017 jyly Qylmystyq kodekstiń birneshe boiynsha aiypty dep tanylǵan bolatyn. Eńbekshi aýdandyq soty ony túpkilikti 21 jyl bas bostandyǵynan aiyryp, jazany barynsha qatań túrde óteýge úkim etken. Sondai-aq, burynǵy kásipkerden memleket paidasyna 1 mlrd 400 mln teńge óndirýdi belgilegen edi.
