Qyzylordada «Elbasy bastamasy – jastar úshin jańa múmkindikter» atty kezdesý ótti. Stýdent jastarmen bolǵan kezdesýde «Nur Otan» partiiasy «Turan» filialynyń esepke alý jáne statistikalyq sektor meńgerýshisi Asylbek Mambetov aldymen Elbasy, partiia Tóraǵasy Nursultan Nazarbaevtyń Qazaqstan halqyna arnaǵan Joldaýlary men baǵdarlamalyq qujattarynda el jastarynyń máselesi mindetti túrde qamtylatyndyǵyn atap ótip, jastarǵa memleket, partiia tarapynan jasalatyn árbir múmkindikti tiimdi paidalanyp, sodan nátije shyǵarý qajet ekenin aitty.
– Elimizde bilim alamyn, jaqsy qyzmet jasaimyn, záýlim úide turamyn dep aldyna maqsat qoiǵan jastar úshin esh kedergi joq. Kerek deseńiz, Elbasymyz shetel asyp, bilim alýǵa barlyq múmkindikterdi jasap otyr. Óziniń 5 áleýmettik bastamasynyń 3 taraýyn jastarǵa arnap, jyl saiynǵy bólinetin 54 myń grantqa qosymsha 20 myń bilim grantyn bólip, stýdent jastardy jataqhanamen qamtýdy tapsyrdy. Al Elbasy óz Joldaýynda JOO bitirgen túlekterdi jumyspen qamtý jóninde naqty tapsyrmalar berdi,- dedi Asylbek Mambetov.
Óz kezeginde Qorqyt Ata atyndaǵy Qyzylorda memlekettik ýniversiteti rektorynyń jastar isi jónindegi kómekshisi, partiia belsendisi Nurjuman Pirnazarov Elbasynyń barshamyzǵa úlken jaýapkershilik júkteitin, keleshekke baǵyt-baǵdar beretin dástúrli Joldaýy men Prezedenttiń 5 áleýmettik bastamasy jastar arasynda úlken qoldaýǵa ie ekendigin aityp, bul baǵytta ýniversitette atqarylyp jatqan jumystarmen tanystyrdy.
– Búginde bizdiń ýniversitette oblys ákiminiń bilim granty negizinde 428 stýdent, olardyń deni tehnikalyq mamandyqtar boiynsha bilim alýda. Biyl onyń 145-i oqý bitiredi. Oǵan qosa Reseidiń ozyq tehnikalyq ýniversitetterinde 500-ge jýyq qyzylordalyq túlekter jańa dáýirdiń suranysyna sai mamandyqtardy igerýde. Jataqhana máselesi de tolyq sheshilgen. Barlyq jataqhanalarda stýdentterge tiimdi jaǵdailar qarastyrylǵan. Oǵan ornalasqysy kelgen árbir stýdenttiń ótinishi bekitilgen ýaqytyna sai jáne der kezinde qanaǵattandyrylyp keledi, – dedi Nurjuman Pirnazarov.
Jalpy kezdesýge ýniversitettegi túrli jastar uiymdarynyń tóraǵalary men belsendi stýdent jastar qatysty. Ýniversitet jastary atynan «Turan» filialynyń «Jas Otan» JQ tóraǵasy Altynbek Lázi sóz alyp, ýniverstitet jastarynyń Elbasy bastamalarynan týyndaityn negizgi mindetter men maqsattardy iske asyrýda, táýelsiz elimizdiń qarqyndy damý jolynda aianyp qalmaityndyqtaryn jetkizdi.
Búginde «Nur Otan» partiiasy «Turan» filialynda partiia músheleriniń sany ósýde. Partiia filialynyń 2292 múshesi bolsa, onyń 1206-sy jastar.
Elaman Maqsotuly
