Shymkenttegi iri metallýrgiialyq Sin Yuan Steel zaýytynyń ainalasynda halyqaralyq janjal órship barady. Qytailyq investorlar men kásiporynnyń advokattary quqyq qorǵaý organdary tarapynan buryn-sońdy bolmaǵan qysym jasalǵanyn ashyq málimdep, kúshtik qurylymdardyń áreketinen kelgen jalpy shyǵyndy 100 million dollar dep baǵalady. Qorǵaýshylardyń pikirinshe, zaýyttaǵy tekserý jeleýimen biznesti turalatý áreketi jasalǵan, dep habarlaidy Ult.kz Informburo31-ge silteme jasap.
Qaqtyǵystyń shielenisken kezeńi 6 mamyrda bastaldy. Sol kúni Uiymdasqan qylmysqa qarsy kúres basqarmasynyń (UQQKB) qyzmetkerleri zaýyt aýmaǵynda aýqymdy reid júrgizdi. Buǵan adamdardy zańsyz ustap otyr degen anonimdi habarlama sebep bolǵan. Alaida tekserý barysynda bul aqparat tolyq rastalmady.
Quqyq buzýshylyqtar anyqtalmaǵanyna qaramastan, kúshtik qurylymdar jappai ustaý sharalaryn júrgizdi: ondaǵan Qytai azamaty, sonyń ishinde negizgi qyzmetkerler men investorlar arnaiy qabyldaý ornyna jetkizilip, onda 15 kún boiy qamaýda ustaldy.
Politsiia áreketteri strategiialyq kásiporynnyń jumysyn is júzinde toqtatyp tastady. Balqytý peshteri men kúrdeli óndiristik jabdyqtar mamandardyń baqylaýynsyz qaldy. Iri tehnogendik apattyń aldyn alý úshin qalǵan qyzmetkerler júielerdi shuǵyl túrde óshirýge májbúr boldy. Májbúrli toqtap qalý men kelisimsharttardyń buzylýy saldarynan kásiporyn orasan zor shyǵynǵa batty.
«Bizge 200 myń dollar kóleminde tikelei, 500 myń dollar kóleminde janama shyǵyn keltirildi. Sonymen qatar memleket salyq túsimderin ala almady. Bul jergilikti ekonomikaǵa aitarlyqtai ziian keltirdi», - dedi kásiporynnyń teń quryltaishysy Ke Siýiýn.
Arnaiy qamaý ornynda ustalǵandardyń arasynda Qazaqstanǵa vizasyz rejim arqyly kelgen iri sheteldik seriktesterdiń bolýy erekshe rezonans týdyrdy. Kásipkerler Shymkent zaýytynyń óndiristik qýatyn keńeitýge shamamen 30 million dollar investitsiia salýdy josparlaǵan. Alaida kelissózderdiń ornyna qujattarynan aiyrylyp, qamaýǵa alynǵan. Kásipkerler mundai oqiǵalar Qazaqstannyń investitsiialyq bedeline aýyr soqqy bolatynyn aityp otyr.
Zaýyt qorǵaýshylary bul jai ǵana kezekti tekserý emes ekenine senimdi. Kásiporyn basshylyǵy politsiia qyzmetkerleriniń laýazymdyq ókilettikterin asyra paidalaný faktisi boiynsha tergeý júrgizýdi talap etip, QR Bas prokýratýrasyna resmi ótinish joldaǵan.
«Biz bul is boiynsha tergeý júrgiziledi dep kútemiz, óitkeni bul qatardaǵy oqiǵa nemese protsessýaldyq qatelik emes. Bul – reiderlik basyp alý belgileri bar maqsatty áreketter nemese onyń artynda basqa da paidany kózdegen múddeler tur», – deidi zaýyt advokaty Marat Baizakov.
