Shymkentte tiisti litsenziiasy men maman sertifikaty bolmaǵan er adam plastikalyq ota jasap, patsienttiń bir kóziniń kórý qabiletinen aiyrylýyna sebep bolǵan. Sot oǵan bas bostandyǵynan aiyrý jazasyn taǵaiyndady, dep habarlaidy ult.kz.
Shymkent prokýratýrasynyń baspasóz qyzmetiniń málimetinshe, er adam áielge zańsyz blefaroplastika jasaǵan. Operatsiiadan keiin patsient bir kóziniń kórý qabiletin tolyq joǵaltqan.
Sot ony Qazaqstan Qylmystyq kodeksiniń 322-babynyń 2-bóligi boiynsha kináli dep tanyp, 1 jyl 6 aiǵa bas bostandyǵynan aiyrdy.
Sonymen qatar sottalǵan adamǵa úsh jyl boiy meditsinalyq jáne farmatsevtikalyq qyzmetpen ainalysýǵa tyiym salyndy.
Prokýratýra azamattardy meditsinalyq qyzmet kórsetýshiniń litsenziiasy men biliktiligin aldyn ala tekserýge shaqyrdy. Vedomstvonyń aitýynsha, tiisti qujaty joq adamdarǵa júginý densaýlyqqa aýyr zardap ákelýi múmkin.
