Shymkentte aptap ystyqtyń áserinen saryshaiandar kóbeiip, jyl basynan beri olardyń shaǵýynan 80 adam meditsinalyq kómekke júgingen. Bul týraly "24KZ" telearnasyna silteme jasap ult.kz habarlaidy.
Mamandardyń aitýynsha, sońǵy ýaqytta ýly jándikter turǵyn úilerdiń aýmaǵynda jii kezdesip júr. Saryshaiandar aiaq kiimniń ishine, tósek astyna, perde arasyna jáne ylǵaldy jerlerge tyǵylýy múmkin. Osyǵan bailanysty dárigerler jeke sektor turǵyndary men qurylysy júrip jatqan jańa shaǵynaýdandarda turatyn azamattardy barynsha saq bolýǵa shaqyrdy.
Dárigerlerdiń málimetinshe, saryshaian shaqqan adam qatty aýyrsynýdy sezinedi. Sonymen qatar aiaq-qoldyń uiýy, bas ainalý, entigý jáne álsizdik siiaqty belgiler paida bolýy múmkin. Sondyqtan mundai jaǵdaida dereý meditsinalyq kómekke júginý qajet.
Shymkent qalalyq giperbariialyq oksigenatsiia ortalyǵynyń bas dárigeri Madina Ermahanbetovanyń sózinshe, saryshaiandar kez kelgen jerde kezdesýi múmkin, alaida olardyń shoǵyrlanýy kóbine jeke turǵyn úiler mańynda baiqalady.
«Shaiandar kez kelgen jerde kezdesýi múmkin. Bul ásirese jeke sektordaǵy turǵyn úilerge qatysty, óitkeni munda osy býynaiaqtylardyń shoǵyrlanýy jii tirkeledi. Sondai-aq qurylys jumystary áli jalǵasyp jatqan jańa aýdandarda da olar kóp kezdesedi. Mundai jerlerde shaian shaǵý qaýpi joǵary bolady. Kóshede olar kóbine aryqtar men ózenderdiń mańyndaǵy ylǵaldy aimaqtarda kezdesedi. Adamdar jerge otyryp nemese jatyp demalady. Keide tósenishsiz bolady. Sondyqtan eń bolmaǵanda jinalmaly tósek nemese osyǵan uqsas qorǵanys quraldaryn paidalanǵan jón», – dedi maman.
