Qazaqstanda qamaýda ustaýǵa bailanysty emes bultartpaý sharasy qoldanylǵan azamattarǵa elektrondyq bilezikter taǵylýy múmkin, dep habarlaidy QazAqparat.
«QR Sybailas jemqorlyqqa qarsy is-qimyl agenttigi qamaýda ustaýǵa bailanysty emes bultartpaý sharasy qoldanylǵan kezde elektrondyq baqylaý quraldaryn (elektrondyq bilezikter) qoldaný máselesin pysyqtaýda. Ozyq halyqaralyq tájiribege súiene otyryp, atalǵan joba qylmystyq protsesti izgilendirýge jáne qamaýda otyrǵan adamdardy azaitýǵa yqpal etedi», - deidi Tsifrlandyrý máseleleri boiynsha agenttik tóraǵasynyń kómekshisi Aslan Qusaiynov.
Sondai-aq, joǵaryda kórsetilgen sharalardy qoldaný sharttaryn buzý faktilerine jedel den qoiýǵa jáne tergeý men sottan jasyryný áreketteriniń jolyn kesýge múmkindik beredi.
«Budan basqa, bul sybailas jemqorlyqqa qarsy qyzmettiń kúshteri men quraldaryn tiimdi paidalanýǵa yqpal etedi», - deidi ol.
