Sybailas jemqorlyqqa qarsy shekteýler qabyldaityn tulǵalarǵa kez kelgen quny bar syilyqtardy syiǵa tartýǵa tyiym salynbaq. Bul týraly QR Sybailas jemqorlyqqa qarsy is-qimyl agenttigi tóraǵasynyń birinshi orynbasary Oljas Bektenov aitty, dep habarlaidy QazAqparat.
Ol búgin Májilistiń jalpy otyrysynda «QR keibir zańnamalyq aktilerine sybailas jemqorlyqqa qarsy is-qimyl máseleleri boiynsha ózgerister men tolyqtyrýlar engizý týraly» zań jobasyn tanystyrǵan bolatyn. Qujatta túzetýlerdiń 3 blogy qarastyrylǵan.
«Birinshi blok - sybailas jemqorlyq kórinisterin júieli túrde aldyn alý boiynsha qosymsha tetikterdi engizýge baǵyttalǵan. Atap aitqanda, Azamattyq kodekstiń erekshe bóliminde syiǵa tartýshynyń paidasyna is-áreketteri úshin ózine sybailas jemqorlyqqa qarsy shekteýler qabyldaityn tulǵalarǵa kez kelgen quny bar syilyqtar syiǵa tartýǵa tyiym salý usynylady. Azamattyq kodekstiń «Syiǵa tartý» atty 509-baptyń qoldanystaǵy redaktsiiasyna sáikes, memlekettik qyzmetshilerge quny 10 ailyq eseptik kórsetkishke deiingi syilyqtardy syiǵa tartý múmkindigine jol beriledi. Osyǵan bailanysty Konstitýtsiialyq keńes 2018 jylǵy 5 maýsymdaǵy óziniń Joldaýynda atalǵan bapty qoldanystaǵy zańnamaǵa sáikes keltirý qajettigin tikelei kórsetti», - deidi tóraǵanyń birinshi orynbasary.
Onyń atap ótýinshe, ekinshiden, «Sybailas jemqorlyqqa qarsy is-qimyl týraly» Zańda sybailas jemqorlyqqa qarsy shekteýler qabyldaityn tulǵalardyń otbasy músheleriniń materialdyq syiaqy, syilyqtar nemese kórsetiletin qyzmetterdi qabyldaýyna tyiym salynady.
Úshinshiden, memlekettik laýazymǵa ne memlekettik nemese olarǵa teńestirilgen mindetterdi atqarýǵa bailanysty laýazymǵa úmitker bolyp tabylatyn tulǵalar úshin uiymnyń basshylyǵyn osy uiymda jumys isteitin jaqyn týystary, jubaiy nemese jekjattary týraly jazbasha nysanda habardar etý mindettemeleri engiziledi.
«Tórtinshi, memlekettik biýdjetten jáne Ulttyq qordan qarjylandyrylatyn jobalardy irikteý men iske asyrýǵa, satyp alýdy uiymdastyrý men ótkizý jónindegi sheshimder qabyldaýǵa jaýapty kvazimemlekettik sektor sýbektileriniń derbes qurylymdyq bólimsheniń basshysynan tómen emes laýazym atqaratyn ýákiletti qyzmetkerlerin sybailas jemqorlyq sýbektilerine jatqyzý usynylady. Besinshi, kvazimemlekettik sektor uiymdarynda parasattylyqtyń korporativtik standarttaryn saqtaýǵa jaýapty sybailas jemqorlyqqa qarsy komplaens-qyzmetter institýty engizilýde», - deidi Oljas Bektenov.
