Búgin QR Sybailas jemqorlyqqa qarsy is-qimyl agenttigi Kadr jumysy departamentiniń basshysy Nurlan Jaqsymbetov agenttik qyzmetkeriniń jańa úlgidegi qyzmettik kýáligin tanystyrdy, dep habarlaidy "Ult aqparat".
«Búgin sizderdiń nazarlaryńyzǵa agenttik qyzmetkeriniń qyzmettik kýáliginiń jańa úlgisin usynǵym kelip otyr. Nelikten biz eski formattan bas tarttyq? Birinshiden, sybailas jemqorlyqqa qarsy is-qimyldyń jańa úlgisin parasattylyq ideologiiasy negizinde ilgerilete otyryp, ótkenniń nyshandary men rámizderinen arylý óte mańyzdy. Qalypsha túrindegi kýálikter qoǵamda jaǵymsyz qabyldanatyndyǵy eshkimge qupiia emes jáne onyń teris paidalanýmen, shekten shyǵýmen túsindirilýi durys sanalady», - dedi ol.
Onyń atap ótýinshe, ekinshiden, bul jańa úlgi únemdi jáne fýnktsionaldy. Jańa kýálikterdi ázirleý quny eskige qaraǵanda 2,5 ese arzan. Bul kýálikterdiń kómegimen agenttiktiń ákimshilik ǵimarattaryna kirý júzege asyrylady. Úshinshiden, barynsha senimdi 6 qorǵanys júiesi bar. Sondyqtan ony qoldan jasaý táýekeli joq.
«Al jalǵan qaǵaz qyzmettik kýálikterin jasaý derekteriniń kóp ekendigi málim. Ókinishke qarai mundai faktiler sybailas jemqorlyqqa qarsy qyzmetti de ainalyp ótken joq. Jaqynda ǵana halyqaralyq izdestirýde júrgen alaiaqtyń jalǵan qalypsha kýálikti paidalanǵany týraly fakti anyqtaldy. Osyndai alaiaqtar ózderin sybailas jemqorlyqqa qarsy is-qimyl agenttiginiń qyzmetkeri retinde tanystyryp, paidakúnemdik maqsatta adamdardy adastyrý nátijesinde jumysymyzǵa nuqsan keltiredi. Azamattardyń senimin buzady», - dedi ol.
N. Jaqsymbetovtyń aitýynsha, tórtinshiden, bekitilgen format halyqaralyq standarttarǵa sáikes keledi.
«EYDU elderinde plastik ID kartalardy politsiia, arnaýy qyzmetterdiń jáne memlekettik organdardyń qyzmetkerleri baiaǵydan paidalanyp júr», - dedi Kadr jumysy departamentiniń basshysy.
