Shymkentte sybailas jemqorlyq quqyq buzýshylyqtarynyń jolyn kesýge yqpal etken 11 tulǵa kótermelengen. Olarǵa syiaqy retinde 2 mln teńgege jýyq aqsha tólengen, dep habarlaidy QazAqparat.
Sybailas jemqorlyqqa qarsy is-qimyl Agenttiginiń Shymkent qalasy boiynsha departamenti basshysynyń birinshi orynbasary T.Serikbaevtyń aitýynsha, árbir qylmystyq is boiynsha memlekettik organdar men uiymdarǵa sybailas jemqorlyq quqyq buzýshylyq jasaýdyń sebepteri men alǵysharttaryn joiý týraly usynýlar engizilýde.
«Aǵymdaǵy jyldyń 8 aiynda Departamentpen qylmystyq isterdi tergeý sheńberinde memlekettik organdarǵa 34 usynym engizilip, búgingi kúnge onyń 32-i qaraldy. Qaraý nátijesi boiynsha 16 laýazymdy tulǵa tártiptik jaýapkershilikke tartyldy», - dedi Talǵar Serikbaev.
Jyl basynan beri departamentpen 63 qylmys tirkelip, onyń ishinde 45 sybailas jemqorlyq sipatynda bolǵan.
«Tirkelgen qylmystardyń basym bóligin paraqorlyq jáne jymqyrý faktileri quraidy. Jymqyrý faktileri boiynsha 17 jáne paraqorlyq faktileri boiynsha 30 qylmys tirkeldi. Salalar boiynsha anyqtalǵan qylmystardyń eń kóp sany quqyq qorǵaý blogynda- 13, qurylys salasynda 12, bilim – 8, densaýlyq saqtaý – 7, salyq jáne jer qatynastary salalarynda - 3 qylmystan tirkelgen. Sybailas jemqorlyq jasaǵany úshin 29 tulǵa áshkerlendi. Tirkelgen qylmystyq ister boiynsha qabyldanǵan sharalar nátijesinde memleket kirisine 1 mlrd 607 mln teńge óndirilgen», - deidi Talǵar Serikbaev.
