Muny jazǵan Qul Ait-Man: sózderi – ylai-tuman; júregi – kir ait-man, súiegi – kúl ait-man…
ÓRT
I
Órt ishinde janyp jatyr bes bóbek!..
Ne isteý kerek? Ne istemek jón? Ne istemek?
Jan-shyrylyn estý úshin olardyń –
Ar men Iman,
Sana men Jad,
Es kerek!
Shyńǵyrsań da álem menen kúlemge,
Jan tappaisyń qyzyl órtke kirerge.
Bes bóbekke kelmeidi eshkim!
Óitkeni
BES MÁSELE qaralmaǵan bul elde!
Bes tal gúlim… janýda bes búldirshin,
Ai ańyrap, juldyz shýlap shyńǵyrsyn –
ODAN DA ÓTKEN MÁSELE KÓP MAŃYZDY,
Jeti túnde janǵan otqa kim kirsin?!
Báń umytqan órtengen bes botamdy,
Jan ulytqan órtengen Hosh-Otandy…
Órt sóndirip júrse túnde júgirip,
Kim qushady «órtengen» jas toqaldy?!
Lapyldaidy, shyrqyraidy – bes qyrshyn!
O ol órtke bettei almas eshbir sum.
Ol JAN-ÚNDI estimediń fánide,
Órt-Tozaqtyń túbinde ony estirsiń!
Saryarqanyń sary aiazy saqyldap,
Týǵan Otan kórgennen soń aqyr jat –
Pana tappai bes kógershin ketti ushyp,
Qara túnde qanattary lapyldap!
II
Tiri múrde. Kúl keiipti músinge
Ainalsam da, qyp-qyzyl órt – ishimde.
Týǵan Tilim – otyz jyldai órtengen,
Lapyldaidy meniń otyz tisimde!
Súiegimniń shashylǵanmen kúli kók,
Bul bir órttiń basylatyn túri joq.
«Jasyl arna» – kápir-arna órtegen
Laýlaimyn kep Áziret Sultan dini bop!
Qońyr qozym, senip qyzyl qasqyrǵa,
Júrsiń áli órt-topannyń astynda.
Taý sharpidy órt –
úni bolyp qazaqtyń
Qunsyz ketken «Qyzylaǵash» – tasqynda!
Aq ordamnyń túndigine shoq túsip,
Shoshyp ketem, órtenerdei ot qushyp.
Kók sharpidy órt –
quny bolyp qazaqtyń
Qan-Ózende qyrǵyn tapqan oqqa ushyp!
Ýa, qashan oralasyń, Qut-Aibyn? –
Endi qansha órtenemin, jutaimyn?
Bult kóshedi…
Tútini edi ol qazaqtyń –
Tozaǵynda janǵan Kápir-Qytaidyń!
Júrek laýlap, til lapyldap, qozdy urtym,
Júrgen jendet toidyra almai kóz qurtyn
Búldirshinin tastai salad otqa úitip,
Ol sebebi oqqa qiǵan – óz jurtyn!
Ei, Er Qazaq, eske ap baǵzy Sertińdi,
Jaz dertińdi, ash nursipat-kórkińdi.
Óziń qorǵa óz kentińdi! –
Kórdiń ǵoi:
Órt ishinde botań janyp jatsa da,
Órt ishinde Otan janyp jatsa da,
Eshkim kelip sóndirmeidi órtińdi!
Qorǵamasań, – tekke ketpes bul qurban,
Iziń-tozyń joǵalady tul qyrdan…
…Qabirińde –
Qaýyzynan jas tóger
Bes qyzǵaldaq – órt ishinde shyńǵyrǵan!..
Svetqali Nurjan
