سۆەتقالي نۇرجان: بەس قىزعالداق – ٶرت ٸشٸندە شىڭعىرعان!..

مۇنى جازعان قۇل ايت-مان: سٶزدەرٸ – ىلاي-تۇمان; جٷرەگٸ – كٸر ايت-مان, سٷيەگٸ – كٷل ايت-مان…

ٶرت

I

ٶرت ٸشٸندە جانىپ جاتىر بەس بٶبەك!..

نە ٸستەۋ كەرەك? نە ٸستەمەك جٶن? نە ٸستەمەك?

جان-شىرىلىن ەستۋ ٷشٸن ولاردىڭ –

ار مەن يمان,

سانا مەن جاد,

ەس كەرەك!

شىڭعىرساڭ دا ەلەم مەنەن كٷلەمگە,

جان تاپپايسىڭ قىزىل ٶرتكە كٸرەرگە.

بەس بٶبەككە كەلمەيدٸ ەشكٸم!

ٶيتكەنٸ

بەس مەسەلە قارالماعان بۇل ەلدە!

بەس تال گٷلٸم… جانۋدا بەس بٷلدٸرشٸن,

اي اڭىراپ, جۇلدىز شۋلاپ شىڭعىرسىن –

ودان دا ٶتكەن مەسەلە كٶپ ماڭىزدى,

جەتٸ تٷندە جانعان وتقا كٸم كٸرسٸن?!

بەڭ ۇمىتقان ٶرتەنگەن بەس بوتامدى,

جان ۇلىتقان ٶرتەنگەن حوش-وتاندى…

ٶرت سٶندٸرٸپ جٷرسە تٷندە جٷگٸرٸپ,

كٸم قۇشادى «ٶرتەنگەن» جاس توقالدى?!

لاپىلدايدى, شىرقىرايدى – بەس قىرشىن!

و ول ٶرتكە بەتتەي الماس ەشبٸر سۇم.

ول جان-ٷندٸ ەستٸمەدٸڭ فەنيدە,

ٶرت-توزاقتىڭ تٷبٸندە ونى ەستٸرسٸڭ!

سارىارقانىڭ سارى ايازى ساقىلداپ,

تۋعان وتان كٶرگەننەن سوڭ اقىر جات –

پانا تاپپاي بەس كٶگەرشٸن كەتتٸ ۇشىپ,

قارا تٷندە قاناتتارى لاپىلداپ!

II

تٸرٸ مٷردە. كٷل كەيٸپتٸ مٷسٸنگە

اينالسام دا, قىپ-قىزىل ٶرت – ٸشٸمدە.

تۋعان تٸلٸم – وتىز جىلداي ٶرتەنگەن,

لاپىلدايدى مەنٸڭ وتىز تٸسٸمدە!

سٷيەگٸمنٸڭ شاشىلعانمەن كٷلٸ كٶك,

بۇل بٸر ٶرتتٸڭ باسىلاتىن تٷرٸ جوق.

«جاسىل ارنا» – كەپٸر-ارنا ٶرتەگەن

لاۋلايمىن كەپ ەزٸرەت سۇلتان دٸنٸ بوپ!

قوڭىر قوزىم, سەنٸپ قىزىل قاسقىرعا,

جٷرسٸڭ ەلٸ ٶرت-توپاننىڭ استىندا.

تاۋ شارپيدى ٶرت –

ٷنٸ بولىپ قازاقتىڭ

قۇنسىز كەتكەن «قىزىلاعاش» – تاسقىندا!

اق وردامنىڭ تٷندٸگٸنە شوق تٷسٸپ,

شوشىپ كەتەم, ٶرتەنەردەي وت قۇشىپ.

كٶك شارپيدى ٶرت –

قۇنى بولىپ قازاقتىڭ

قان-ٶزەندە قىرعىن تاپقان وققا ۇشىپ!

ۋا, قاشان ورالاسىڭ, قۇت-ايبىن? –

ەندٸ قانشا ٶرتەنەمٸن, جۇتايمىن?

بۇلت كٶشەدٸ…

تٷتٸنٸ ەدٸ ول قازاقتىڭ –

توزاعىندا جانعان كەپٸر-قىتايدىڭ!

جٷرەك لاۋلاپ, تٸل لاپىلداپ, قوزدى ۇرتىم,

جٷرگەن جەندەت تويدىرا الماي كٶز قۇرتىن

بٷلدٸرشٸنٸن تاستاي سالاد وتقا ٷيتٸپ,

ول سەبەبٸ وققا قيعان – ٶز جۇرتىن!

ەي, ەر قازاق, ەسكە اپ باعزى سەرتٸڭدٸ,

جاز دەرتٸڭدٸ, اش نۇرسيپات-كٶركٸڭدٸ.

ٶزٸڭ قورعا ٶز كەنتٸڭدٸ! –

كٶردٸڭ عوي:

ٶرت ٸشٸندە بوتاڭ جانىپ جاتسا دا,

ٶرت ٸشٸندە وتان جانىپ جاتسا دا,

ەشكٸم كەلٸپ سٶندٸرمەيدٸ ٶرتٸڭدٸ!

قورعاماساڭ, – تەككە كەتپەس بۇل قۇربان,

ٸزٸڭ-توزىڭ جوعالادى تۇل قىردان…

…قابٸرٸڭدە –

قاۋىزىنان جاس تٶگەر

بەس قىزعالداق – ٶرت ٸشٸندە شىڭعىرعان!..

سۆەتقالي نۇرجان