Mańǵystaý oblysynyń ákimdigi suiytylǵan gaz baǵasynyń qymbattaýy týraly pikir bildirdi jáne jii qoiylatyn suraqtarǵa jaýap berdi, dep habarlaidy QazAqparat.
- Suiytylǵan gaz baǵasynyń qymbattaýyna ne sebep boldy ?
- 2022 jylǵy 1 qańtardan bastap suiytylǵan gaz óndirýshiler munai ónimderin 100% elektrondy saýda arqyly satýǵa kóshti. Bul rette respýblika boiynsha gazdyń ortasha baǵasy litrine 110 teńgeni, kórshiles Atyraý oblysynda - 115 teńgeni nemese Oralda - 120 teńgeni quraidy.
Qazirgi ýaqytta oblys boiynsha aqyrǵy tutynýshyǵa deiingi gaz baǵasy 95-ten 115 teńgege deiin aýytqyp tur.
- Buryn gaz baǵasy 60 teńge bolatyn. Bul baǵa qaita oralýy múmkin be, ákimdik gaz baǵasyn retteýmen ainalysa ma?
- 60 teńge mólsherindegi burynǵy baǵa endi bolmaidy, óitkeni qazir birjadaǵy gazdyń baǵasy tasymaldaý jáne kásipkerdiń operatsiialyq shyǵystaryn esepke almaǵanda litrine 70-85 teńgeni kórsetip tur. Tutastai alǵanda, gazdyń baǵasyn naryqtyń ózi suranys pen usynysqa qarai qalyptastyratyn bolady.
Ákimdik gaz baǵasyn retteýge qatyspaidy, óitkeni bul taýar básekelestik ortaǵa tiesili.
Degenmen, jeke kásipkerler tarapynan baǵany negizsiz kóterý faktileri týyndaǵan jaǵdaida QR Básekelestikti qorǵaý agenttiginiń departamenti ákimshilik sharalar qabyldaidy.
- Jańaózende suiytylǵan gaz óndiretin zaýyt bar. Nelikten zaýyt ónimderi óńirge jetpei otyr ?
- Oblysta 1973 jyldan beri gaz óndiretin jalǵyz kásiporyn – Qazaq gaz óńdeý zaýyty. Ol aiyna 14,5 myń tonna suiytylǵan gaz óndiredi. Alaida, oblystyń tutyný kólemi 18 myń tonnaǵa jetkendikten, zaýyt óńir qajettiligin tolyq ótei almaidy. Sondyqtan basqa óńirlerden qosymsha 3,5 myń tonna gaz jetkiziledi.
Búgingi tańda Qazaq gaz óńdeý zaýytynyń negizgi jabdyqtary 90%-ǵa tozǵan. Eger shuǵyl sharalar qoldanylmasa, aldaǵy ýaqytta zaýyt toqtap, suiytylǵan gaz tapshylyǵy bolýy múmkin. Suiytylǵan gazdy óz naryqtyq baǵasyna ótkizýdiń arqasynda jańa zaýyt salý josparlanýda.
