Jyl saiyn 25 ónerkásiptik taýarlyq sút fermasy paidalanýǵa beriledi. Bul týraly Aýyl sharýashylyǵy ministri Saparhan Omarov málim etti, dep habarlaidy QazAqparat.
«2020 jyly zamanaýi tsifrlyq tehnologiialar qoldanylatyn 25 ónerkásiptik taýarlyq sút fermalary, 3 et kombinaty, 8 qus fabrikasy salynady. Sonymen birge, 2000 gektarǵa baq otyrǵyzý josparlanýda, Jambyl oblysynda qant zaýytynyń qurylysy bastalyp ketti. Bul jobalardyń barlyǵy boiynsha ótken jyly daiyndyq jumystary júrgizildi, naqty investorlar aiqyndalyp, qazirgi ýaqytta qarjylandyrý máselesi sheshilýde», - dep toqtaldy S. Omarov Parlament Májilisindegi Úkimet saǵatynda.
Onyń sózine qaraǵanda, úsh jyl ishinde irimshik pen súzbe óndirisi 16,2 paiyzǵa ulǵaiyp, 29,5 myń tonnany qurady. Qamtamasyz etilý 54,8 paiyzdan 57 paiyzǵa deiin ósti.
«Bul rette, elimizde shamamen 5,8 mln tonna sút óndirilgenimen, sút zaýyttarynyń júktelýi qazir shamamen 65 paiyzdy quraidy. Osyǵan bailanysty, jyl saiyn 25 ónerkásiptik taýarlyq sút fermasyn engizý arqyly sút óndirisin qarqyndy formatqa aýystyrý usynylady. Bul jyl saiyn qosymsha 120 myń tonnaǵa deiin sút óndirýge jáne 1250 jumys ornyn qurýǵa múmkindik beredi. Osy úshin qarjylandyrýdyń jeńildetilgen sharttary paidalanylatyn bolady», - dedi vedomstvo basshysy.
Bul sharalardy iske asyrý esebinen 5 jyl ishinde sút zaýyttarynyń tolyq júktelýin qamtamasyz etý josparlanýda.
