QR Premer-Ministri Álihan Smaiylovtyń tóraǵalyǵymen ótken Úkimet otyrysynda «Deni saý ult» árbir azamat úshin sapaly jáne qoljetimdi densaýlyq saqtaý» ulttyq jobasyn iske asyrý barysy qaraldy, dep habarlaidy primeminister.kz saity.
Densaýlyq saqtaý ministri Ajar Ǵiniiat 2022 jyldyń birinshi jartyjyldyǵynda Ulttyq jobanyń is-sharalaryn iske asyrý halyq densaýlyǵynyń negizgi kórsetkishterin jaqsartýǵa múmkindik bergenin habarlady. Mysaly, qan ainalym júiesi aýrýlarynan bolatyn ólim-jitim 21,4%-ǵa, qaterli isikterden 8,7%-ǵa, tynys alý aǵzalarynyń aýrýlarynan 23%-ǵa jáne týberkýlezden 12%-ǵa tómendedi. Halyqtyń jalpy ólim-jitimi 15,5%-ǵa azaidy.
Ótken kezeńde kúrdeli jáne joǵary tehnologiialyq meditsinalyq qyzmetterdiń 80 túri boiynsha 18 myńnan astam qyzmet kórsetildi. Onkologiialyq kómektiń sapasyn arttyrý úshin Gamma-pyshaq jáne iadrolyq meditsina ortalyqtary jumys isteidi, onda 300-den astam operatsiia jasaldy jáne 400-ge jýyq patsient emdeldi.
Shalǵaidaǵy aýyldardyń 1 mln-nan astam turǵyny úshin 149 jyljymaly meditsinalyq keshen konsýltatsiialyq-diagnostikalyq qyzmetter, dári-dármek usyna otyryp, meditsinalyq kómek kórsetildi. Biyl 10 óńirde meditsinalyq kómek kórsetken 2 «Járdem» jáne «Salamatty Qazaqstan» meditsinalyq poiyzdarynyń jumysy qaita jandandy.
Jalpy aýyldyq eldi mekenderdi meditsinalyq-sanitarlyq alǵashqy kómekpen jáne diagnostikamen qamtý jospar boiynsha 47% bolǵanda, 49%-ǵa deiin jetkizildi. Tegin meditsinalyq kómektiń kepildik berilgen kólemi aiasynda jáne mindetti áleýmettik meditsinalyq saqtandyrý júiesinde ambýlatoriialyq deńgeidegi meditsinalyq kómektiń kólemi 56%-ǵa deiin jetkizildi.
Aýdandyq aýrýhanalardy zamanaýi kompiýterlik tomograftarmen, rentgen apparattarymen jabdyqtaý jalǵasýda, Astana jáne Almaty qalalarynda eki ǵylymi-innovatsiialyq kópbeiindi klinika salynyp jatyr, birqatar óńirde 8 balalardy ońaltý ortalyǵy ashyldy.
Óńirlerde ulttyq jobany iske asyrý barysy týraly Jambyl oblysynyń ákimi Nurjan Nurjigitov pen Shymkent qalasynyń ákimi Murat Áitenov baiandady.
Baiandamashylardy tyńdap bolǵan Premer-Ministr qazirgi ýaqytta jańa densaýlyq saqtaý obektilerin salýǵa, meditsinalyq tehnika satyp alýǵa, zamanaýi tehnologiialardy engizýge, kadrlardy oqytýǵa qomaqty qarajat jumsalyp jatqanyn aitty.
Máselen, qymbat meditsinalyq zertteýler qoljetimdi boldy, byltyr naýqastardy radiohirýrgiialyq emdeýge arnalǵan Ortalyq Aziia elderindegi tuńǵysh Gamma-pyshaq ortalyǵy ashyldy, meditsina qyzmetkerleriniń jalaqysy aitarlyqtai ósti.
«Memleket basshysynyń tapsyrmasy boiynsha “Aýylda densaýlyq saqtaýdy jańǵyrtý” pilottyq jobasy ázirlenýde, 2025 jylǵa qarai aýyldyq eldi mekenderde 650 alǵashqy meditsinalyq-sanitarlyq kómek obektisin salý kózdelip otyr. Sondai-aq 32 aýdandyq aýrýhana jańǵyrtylatyn bolady», — dedi Álihan Smaiylov.
Sonymen qatar Premer-Ministr tez arada sheshilýi tiis birqatar máselelerdi qozǵady. Atap aitqanda, Úkimet basshysy azamattardyń TMKKK jáne MÁMS boiynsha ótinishterin aitty.
«Birinshi kezekte dárigerlik kómektiń kólemi jetkiliksiz dep shaǵym aitýda. Densaýlyq saqtaý jáne Qarjy ministrligimen birlesip, 1 qarashaǵa deiin olardy qarjylandyrýdy jetildirý jóninde usynystar daiyndaýdy tapsyramyn», — dedi Álihan Smaiylov.
Premer-Ministrdiń aitýynsha, ana men bala óliminiń kórsetkishterin tómendetý úshin shuǵyl sharalar qabyldaý jáne áielder men jańa týǵan nárestelerdiń densaýlyǵyna turaqty monitoring júrgizý kerek. Odan bólek, múmkindigi shekteýli balalarǵa ýaqytyly ońaltý kómegin kórsetýge erekshe nazar aýdarý qajet.
«Óńirlermen birlesip, zamanaýi perinataldyq ortalyqtar salý jáne balalar aýrýhanalaryn kerekti jabdyqtarymen jaraqtandyrý jóninde sharalar qabyldaý qajet», — dedi Álihan Smaiylov.
Sonymen qatar Premer-Ministr suranysqa ie mamandyqtar boiynsha bilim berý granttarynyń sanyn arttyrý máselelerin pysyqtaýdy jáne densaýlyq saqtaý júiesin tsifrlandyrý boiynsha júrgizilip jatqan jumystar aiasynda meditsinalyq aqparat júieleriniń integratsiialanýyn qamtamasyz etýdi tapsyrdy.
