Eńbek naryǵynda suranysqa ie 28 jańa mamandyq memlekettik tapsyrys arqyly oqytylady. Bul týraly búgin Úkimet otyrysynda «Nátijeli jumyspen qamtý jáne jappai kásipkerlikti damytý baǵdarlamasy» týraly baiandaǵan Bilim jáne ǵylym vitse-ministri Bibigúl Asylova aitty, dep habarlaidy QazAqparat tilshisi.
«Kadrlardy oqytýdaǵy memlekettik tapsyrystyń qurylymy óńirlerdiń suranysyna sáikes ózgertildi. Mysaly qyzmet kórsetý, aýyl sharýashylyǵy jáne kólik salalary boiynsha kadrlardy oqytý 10 paiyzdan asa ósti. Jumys berýshilerdiń usynysymen eńbek naryǵynda suranysqa ie 28 jańa mamandyq memlekettik tapsyrysqa engizildi», - dedi vitse-ministr.
Onyń atap ótýinshe, oqý protsesine 246 modýldik oqý baǵdarlamasyn engizý arqyly kadrlardy daiyndaý mazmuny jáne memlekettik jalpy bilim berý standarty ózgertildi. Bul bizneske dýaldy oqytýda 80 paiyzǵa deiin, dástúrli bilim berýde 50 paiyzǵa deiin ózgerister engizýge múmkindik beredi.
«Baǵdarlamanyń barlyq qatysýshylaryna shákirtaqy, ystyq tamaq jáne jolaqy qarastyrylǵan. Baǵdarlamany qarjylandyrý úshin respýblikalyq biýdjetten qosymsha 17,2 mlrd teńge bólinip, jergilikti biýdjetterge jiberildi», - dedi Bibigúl Asylova.
