Ulttyq ekonomika ministri Rýslan Dálenov Eýraziia ekonomika odaǵy aiasynda Qazaqstan eksportyn shektep turǵan basty problemalardy atady, dep habarlaidy "Ult aqparat".
«Qazir birqatar másele bar. Biz olardy «sur tizim» dep ataimyz. Oǵan alkogoldi ónimder, aktsizdi ónimder, antidempingti salyqty tergeý, básekege qabiletti usyný máseleleri kiredi. Onyń bárin durystap zerttep, qarastyrý kerek. Oǵan qatysty suraqtar burynnan týyndap keledi. Taǵy biri – memlekettik satyp alý, memlekettik satyp alýǵa qoljetimdilik, ártúrli aqparattyq júieler men tsifrlyq qoltańbalar. Munyń bári - básekege qabilet máselesi. Ártúrli kásiporynda ondai másele bar. Onyń bári álbette Eýraziia ekonomikalyq komissiiada qaralyp jatyr. QQS boiynsha stavka ártúrli. Reseidegi QQS-tiń joǵary stavkasy meniń oiymsha eksportty yntalandyrmaidy – basqa elderden taýardyń kirip ketpeýin qadaǵalaidy», - dedi Rýslan Dálenov Parlament Senatynyń otyrysynda.
Ministr bul turǵyda óz oiyn bildirdi.
«Resei Federatsiiasy kez kelgen taýardy shekarada 20 paiyzdyq qosymsha qunmen kútip alady. Al Qazaqstanda importtyq taýarlar boiynsha bul stavka 12 paiyz. Bul turǵyda stavkasy joǵary memlekette basymdyq bolýy múmkin. Ekinshi jaǵynan eksport kezinde eksport týraly rastalatyn qujat alý qiyn, iaǵni nóldik stavkany paidalaný kúrdeli. Eger kásiporyn shaǵyn bolsa, Qazaqstandaǵy kontr-seriktes taýardy RF-dan alyp kele jatqanyn rastaýy kerek. Reseilik eksporter úshin nóldik stavkany paidalaný árdaiym sátti bola bermeidi. Sol sebepti olardyń taýary boiynsha stavka 20 paiyz bolyp qala beredi», - dedi ol.
Rýslan Dálenov Qazaqstandaǵy 12 paiyzdyq stavka eksportqa ónimdi shyǵarýǵa jol ashatynyn aityp ótti.
«Nóldik stavkany qalamaityndar 12 paiyzben ótedi. Qazaqstandyq kásipkerlerde jalpy RF-ǵa ónimin eksporttaýda basymdyq bar», - deidi Rýslan Dálenov.
