Qazaqstanda karantin joq aýmaqtarda iri saýda obektileriniń qyzmeti toqtatylmaidy. Bul týraly QR Saýda jáne integratsiia ministri Baqyt Sultanov Facebook-tegi paraqshasynda jazdy, dep habarlaidy "Ult aqparat".
Sóz basynda Saýda jáne integratsiia ministri Almaty men Nur-Sultan qalalarynda bul talap saqtalatynyn atap ótti.
«Nur-Sultan jáne Almaty qalalaryndaǵy saýda nysandary ákimdikterdiń jedel shtabtary sheshkendei, karantinniń aǵymdaǵy rejiminde jumys isteitin bolady» dep jazdy ministr.
Ol, sondai-aq, karantinniń qoldanylǵan qatań sharalary (Nur-Sultan jáne Almaty qalalarynyń jabylýy, elge keletin barlyq adamdardy baqylaý) nátije beretindigin eskergenin, sanitarlyq baqylaýdyń kúsheiýi koronavirýstyń taralýynyń ósýin tejeýge múmkindik beretinin, aýrý tek shet elderden kelgen azamattarda jáne olarmen bailanysqan tulǵalarda ǵana rastalǵanyn atap ótti.
«Osyǵan bailanysty, sanitarlyq-epidemiologiialyq jáne meditsinalyq qyzmetter barlyq yqtimal táýekelderdi jedel anyqtaidy jáne buǵattaidy, biz karantin joq aýmaqtarda iri saýda obektileriniń qyzmetin toqtatpaýǵa sheshim qabyldadyq. Bul saýda obektileriniń qyzmetkerlerine kelýshiler aǵynynyń kúrt azaiýy jaǵdaiynda shekteýli bolsa da, jumys isteýge jáne óz otbasylaryn qamtamasyz etýge múmkindik beredi», - deidi Baqyt Sultanov.
Ministr Tótenshe jaǵdai rejimin qamtamasyz etý jónindegi memlekettik komissiianyń búgingi keńeitilgen otyrysynda elimizdiń Prezidenti Qasym-Jomart Toqaev memlekettik organdarǵa birqatar tapsyrmalar bergenin aitty. Onyń negizgi leitmotivi – qatań oqshaýlaý sharalary men kásipkerler men halyqty aýqymdy qoldaý arasyndaǵy tepe-teńdik, onyń ishinde virýstyń taralýyna qaýip tóndirmeitin jerlerde jumys oryndaryn saqtaý.
«Bul rette, bazarlar, dúkender men dárihanalarda kúsheitilgen sanitarlyq jáne dezinfektsiialyq sharalar boiynsha engizilgen talaptardy taǵy da atap ótemin. Memleket basshysy, sondai-aq, ákimdikterge kommýnaldyq tehnikany, bazarlar men irgeles jatqan aýmaqtarǵa erekshe nazar aýdara otyryp, dezinfektsiialaýǵa qaita beiindeýdi tapsyrdy. Barlyq personal betperde men qolǵaptarda jumys isteýi tiis. Árbir 3 saǵat saiyn arnaiy dezinfektsiialyq quraldarmen barlyq betterdi (edender, ústelder, oryndyqtar, liftiler jáne t.b.) óńdeý qajet. Qoldy óńdeý úshin sanitaizerlerdi ornatý tiis», - dedi ol.
Aita keteiik, saýda jáne qyzmet kórsetý nysandarynyń jumys isteýine qoiylatyn talaptardyń tolyq tizimin Saýda jáne integratsiia ministrliginiń nemese Densaýlyq saqtaý ministrliginiń saitynan kórýge bolady.
