Ótken jyly astanada avtobýstardyń qatysýymen 312 jol-kólik oqiǵasy bolyp, olarda 372 adam jaraqattandy. Bul týraly qala ákimdiginde ótken apparat otyrysynda elorda basshysy Baqyt Sultanov aitty.
Elorda.info saityndaǵy aqparatqa sáikes, otyrysta qoǵamdyq kólik máselesine qatysty «Astana LRT» kompaniiasynyń basqarma tóraǵasy Bekmyrza Igenberdinov baiandady.
«Qoǵamdyq kóliktegi qaýipsizdik máselesi búginde basty nazarda. Bul maqsatta arnaiy komissiia da quryldy. 28 naýryzdan bastap qaladaǵy barlyq avtobýstar tehnikalyq, al júrgizýshiler meditsinalyq tekseristen ótýde. Sondai-aq, avtobýstardyń jol júrý reglamentteri qaita qaralyp, tiisti usynystar ázirlendi. Atap aitqanda, avtobýs júrgizýshileriniń meditsinalyq tekserýden ótý merzimin 1 jyldan 6 aiǵa deiin qysqartý kózdelgen. Sol siiaqty qoǵamdyq kólik qaýipsizdigin qamtamasyz etý maqsatynda ústimizdegi jyly túrli baǵyttaǵy 24 is-shara ótkizgeli otyrmyz. Odan bólek, barlyq parktiń avtobýs júrgizýshileri men kondýktorlaryna qatysty personaldyq taldaý jasaldy. Búginde qala parkterinde 1156 avtobýs bar. Onyń 800-den astamy kúndelikti jelige shyǵady. Jáne de 156 avtobýs jóndeýde tur», - dedi Bekmyrza Igenberdinov.
Óz kezeginde qala ákimi Baqyt Sultanov jolaýshylar avtobýstarynda oryn alǵan jol-kólik oqiǵalaryna qatysty birqatar málimet keltirip, olardy aldaǵy ýaqytta boldyrmaý joldaryn qarastyrýdy tapsyrdy.
«2019 jyldyń basynan beri 82 myń shaǵym kelip túsken. Onyń ishinde jol júrý kestesin saqtamaý, ekipajdyń durys emes áreketi, aialdamadan ótip ketý jáne taǵy basqa kemshilikter aitylǵan. Bul dinamika qyrkúiek aiynan beri artyp keledi. Biraq 7 aidyń ishinde eshqandai ózgeris baiqalmai otyr. Ótken jyly qoǵamdyq kóliktiń qatysýymen 312 jol-kólik oqiǵasy oryn alyp, odan 372 adam jaraqat aldy. Al biyl jyl basynan beri 54 jol-kólik oqiǵasy bolyp, saldarynan 88 adam zardap shekti. Ókinishke qarai 2 ólim jaǵdaiy tirkeldi. Ol - ótken aptada oryn alǵan oqiǵa, ony bárińiz bilesizder», - dedi B.Sultanov.
Elorda basshysy apparat otyrysynda, sondai-aq qalanyń tazalyǵyna qatysty syn aitqan bolatyn.
