1 qyrkúiekte elimizde sýǵa shomylý maýsymy resmi aiaqtaldy, dep habarlaidy "Ult aqparat" QR IIM Tótenshe jaǵdailar komitetiniń baspasóz qyzmetine silteme jasap.
Sýda adamdardyń qaýipsizdigin qamtamasyz etý maqsatynda TJK politsiiamen jáne jergilikti atqarýshy organdarymen birlesip uiymdastyrýshylyq, praktikalyq is-sharalar keshenin júrgizdi. Kún saiyn azamattyq qorǵaý organdary men politsiia qyzmetkerleriniń qatysýymen reidter men patrýldeý júzege asyryldy.
Aǵymdaǵy jyldyń basynan beri elimizdiń sý aidyndarynda qutqarýshylar 160 adamdy, onyń ishinde 35 balany ajaldan aman alyp qaldy. Al, sýǵa shomylý maýsymy bastalǵannan beri (1 maýsymnan 31 tamyz aralyǵynda) 140 adam, onyń ishinde 27 bala qutqaryldy.
Sonymen qatar, sýǵa shomylý kezeńiniń basynan bastap (1 maýsymnan 31 tamyz aralyǵynda) sýǵa shomylý kezinde alkogoldik mas kúiinde, sýǵa batýshyny qutqarý jáne balalardy eresekterdiń qaraýynsyz qaldyrý kezinde 239 adam (2019 jyly 282), onyń ishinde 75 bala (2019 jyly 88 bala) sýǵa ketip, kóz jumdy.
Tek sýǵa shomylý maýsymynyń sońǵy aptasynda (24-31 tamyz aralyǵynda) Almaty, Aqtóbe, Qostanai, Aqmola, Jambyl, Pavlodar, Shyǵys Qazaqstan, Qyzylorda oblystarynda, Shymkent qalasynda 14 adam, onyń ishinde 3 bala sýǵa batyp ketken.
Biylǵy sýǵa shomylý maýsymynda (Almaty - 35, Shyǵys Qazaqstan – 31, Túrkistan oblysy – 23) sýǵa batyp ketken adamdardyń sany kóp boldy.
Elimizde sýǵa shomylýǵa ruqsat etilgen 445 oryn anyqtaldy, 6 020 eskertý belgisi ornatyldy. Adamdardyń sý aidyndaryndaǵy qaýipsizdigin qamtamasyz etý úshin jeke jaǵajailardyń 689 qutqarýshy- jasaqshysy oqytyldy.
Politsiia departamenti volonterlik uiymdarmen birigip qoǵamdyq oryndardaǵy júris-turys jáne sý aidyndarynda qaýipsizdik qaǵidalaryn buzýshylardy anyqtaý boiynsha birlesken reidter men patrýldeý júrgizdi.
Aǵymdaǵy jylǵy 1 maýsymnan bastap 33 myń reid jáne patrýldeý júrgizildi, 6 355 adam ákimshilik jaýapkershilikke tartyldy, «Qoǵamdyq oryndarda bolý qaǵidalaryn buzý» ÁQBK 440-baby jáne «Ortaq sý paidalaný qaǵidalaryn buzý» 364-baby boiynsha 14 mln-nan astam teńge aiyppul salyndy.
Reid is-sharalary barysynda sý aidyndaryndaǵy qaýipsizdik sharalary boiynsha halyqpen túsindirý jumystary júrgizildi. 499 564 úgit-nasihat ónimderi (paraqshalar, jadynamalar) taratyldy.
