Parlament Májilisiniń jalpy otyrysynda QR Joǵarǵy sotynyń Azamattyq ister jónindegi sot alqasynyń tóraǵasy Meirambek Taimerdenov sýdialar jumysynda josparlanyp otyrǵan ózgerister týraly aityp berdi, dep habarlaidy QazAqparat.
Búgin jalpy otyrysta «Qazaqstan Respýblikasynyń Azamattyq protsestik kodeksine sottar jumysynyń zamanaýi formattaryn endirý, artyq sot rásimderi men shyǵyndaryn qysqartý máseleleri boiynsha ózgerister men tolyqtyrýlar engizý týraly» zań jobasy birinshi oqylymda talqylanýda.
«Zań jobasy úsh baǵyttan turady. Birinshiden, sottar jumysyn zamanaýi formatqa keltirý. Ekinshiden, azamattyq protsestegi tiimdilikti arttyrý, úshinshiden, sot isin júrgizýdegi tsifrlandyrý qamtyldy. Bul túzetýler bizdiń azamattarǵa ne beredi? Sottarǵa «nege sýdia isti qaraǵanda onyń aq-qarasyna tereń úńilmeidi», «nege tek usynylǵan dálelderdi qanaǵattandyryp, sheshim shyǵarady» degen syn aitylady. Osyǵan sebep - qoldanystaǵy Azamattyq protsestik kodekstiń talaby. Kodeks boiynsha sýdia eshbir jaǵdaida talap-aryz aiasynan shyqpaýy tiis, ony mindettep qoiǵan. Taraptar neni talap etse, tek sol máseleni qarap, tek sol másele boiynsha ǵana sheshim qabyldaýy kerek. Óz betinshe basqa mán-jailardy anyqtaýǵa, ózge dálelderdi suratýǵa sýdialardyń esh quqyǵy joq», - dedi Meirambek Taimerdenov.
Osy oraida ol búgingi Azamattyq protsestik kodekste sýdianyń qoly bailaýly ekenin atap ótti.
«Bul problemany sheshýdiń bir ǵana joly bar, iaǵni sýdianyń protsestik rólin túbegeili ózgertý. Ádil sheshim qabyldaý úshin ol daýdy jan-jaqty, egjei-tegjeili túsinip, anyqtaýy qajet. Bul degenimiz, sýdia protsestik jaǵynan erkin bolýy qajet. Qandai ýájdi nemese dálelderdi zertteý kerek ekenin ol ózi anyqtaýy qajet. Bul biz ashyp otyrǵan jańalyq emes, ozyq damyǵan elderdiń sottarynda qalyptasqan tájiribe», - dedi Azamattyq ister jónindegi sot alqasynyń tóraǵasy.
Oǵan qosa, joba boiynsha sýdialardy qabyldaǵan sheshimderin, quqyqtyq saldaryn, iaǵni sýdianyń naqty osy is boiynsha nege mundai sheshimge kelgendigin taraptarǵa protsesten keiin túsindirýdi mindetteý eskerilgen.
