Sýdialyq kadrlar álsiz bolsa, onda eshqandai sýper-zańdar bizge kómektespeidi. Bul týraly elordada QR Prezidenti Qasym-Jomart Toqaevtyń tóraǵalyǵymen ótip jatqan Sheteldik investorlar keńesiniń 32-shi jalpy otyrysynda Joǵarǵy sot tóraǵasy Jaqyp Asanov málim etti, dep habarlaidy QazAqparat.
"Qazirgi kezde "Sot ádildigi qashan naqty ádiletti bolady?", "Sottarda sybailas jemqorlyq qashan joiylady?", "Sottardan biliksiz sýdialar qashan ketedi" dep bizden surap jatady. Prezident myrza, 2020 jyl bizdegi sot ádildiginiń sapaly serpilisiniń bastaýy bolatynyna senimdimiz. Bul senimdilik qandai tujyrymǵa negizdelgen? Mańyzdy alǵysharttardy 2018 jyly Elbasy qalaǵan bolatyn", - dedi Jaqyp Asanov.
Sonymen qatar Joǵarǵy sot tóraǵasy QR Prezidenti Qasym-Jomart Toqaevtyń sailaýaldy tuǵyrnamasynyń da mańyzdy yqpaly bar ekenin atap ótti.
"Ótken 1,5 jylda barlyq kúsh-jiger men resýrstardy ondaǵan qanatqaqty jobalar men 17 zańdaǵy túzetýlerge baǵyttadyq. Qazirgi kezde bul jumys joǵary qarqyn alyp otyr. Alaida túbegeili ózgerister ýaqytty talap etedi. Obektivti shekteýler men sýdialardyń táýelsizdigi, sot tóraǵalarynyń táýelsizdigi bar. Sottarda basqarý men sheshimderdi qabyldaý júiesi basqa qurylymdardan túbegeili ózgeshe. Kez kelgen memorganda ózgerister birinshi basshynyń buiryǵymen oryn alady. Sýdialarda basshysy bolmaidy, árqaisysy sheshimdi ózi shyǵarady. Sondyqtan sottardyń adami kapitalyn damytý - bul sot reformasynyń negizi. Eger de sýdialyq kadrlar álsiz bolsa, onda eshqandai sýper zańdar bizge kómektespeidi. Bul problemany qalai sheshý kerek? Onyń jaýaby ońai, iaǵni sýdia mamandyǵyn tartymdy etý kerek", - dedi Jaqyp Asanov.
Osy oraida ol eńbekaqynyń tómendigi, jumystaǵy shekten tys júkteme, sýdialardy irikteýdegi kemshilikter bul salaǵa bilikti mamandardyń tartylýyna kedergi bolǵanyn atap ótti.
Sondai-aq, Joǵarǵy sot tóraǵasy biliktiligi tómen sýdialar úshin sotqa jol jabyq ekenin aitty.
"2019 jyldyń qańtarynan eńbekaqy (sýdialardyń) eleýli túrde artty. Ásirese, qarap jatqan isteri qiyn ári jumys kólemi aýqymdy adamdardyń eńbekaqysy ósti. Ekinshiden, daý-damai joq isterden bosatyp jatyrmyz. Biylǵy mamyrdan bastap 10 jylda alǵash ret sot júktemesi qysqaryp keledi", - dedi Jaqyp Asanov.
Onyń sózine qaraǵanda, atqarylyp jatqan tyń qadamdardyń biri HR menedjment tetikterimen sýdialardy irikteýdiń jańa júiesin júzege asyrý bolǵanyn atap ótti.
"Bul óz kezeginde bastapqydan qatań tosqaýyldy qoiady, iaǵni biyldan álsiz sýdialar úshin sotqa jol jabyq boldy. Sonymen qatar, Joǵarǵy sot keńesi úlken ról atqarady", - dedi ol.
Osy oraida J. Asanov ziiatkerlik jáne monopoliialyq quqyq, salyq, jer qoinaýyn paidalaný, ekologiia salasyndaǵy bilikti zańgerlerdi sýdialyq qyzmetke shaqyrdy.
Onyń sózine qaraǵanda, eger de qyzmettegi sýdianyń biliktiligi tómen bolsa, etika boiynsha problemasy baiqalsa nemese sybailas jemqorlyqqa jaqyn bolsa, onda jańa júie boiynsha ol adam bul qyzmette otyra almaidy.
"Uqsas ister boiynsha ártúrli sheshimder shyǵarylyp jatady dep bizge syn aitylady. Anyq emes zań normalary saldarynan árqaisysy ony ózinshe túsinedi. Al kóptegen naqty jaǵdailar boiynsha zańnamada tiisti jaýapty tabý qiyn. Sondyqtan Joǵarǵy sot "Atameken" UKP-men birlese vedomstvoaralyq 5 topty qurdy. Onyń maqsaty - salyq, jer, jer qoinaýyn paidalaný jáne basqa da máseleler boiynsha biryńǵai tájiribeni qalyptastyrý", - dedi Jaqyp Asanov.
