Sýdialarǵa aqparattyq qysym kún ótken saiyn kóbeiip keledi. Bul týraly QR Joǵarǵy sotynyń baspasóz hatshysy Aidos Sádýaqasov aitty, dep habarlaidy QazAqparat.
«Bul, búgingi kún tártibindegi óte ózekti másele. Ony Prezidenttiń óz aýyzynan estigenimizge qýanyshtymyz. Shyn máninde, sýdialarǵa aqparattyq qysym kún ótken saiyn kóbeiip keledi. Ásirese, zańdy bilmeitin, «túimedeidi túiedei qylatyn» blogerler tarapynan bar. Ókinishke orai, keibir kásibi advokattardyń ózi sot úkimi shyqpai, protsess aiaqtalmai jatyp sheshimderin halyqqa tańyp jatady. Sýdianiki durys dep shyǵatyndardy da baiqap otyrmyz. Árine, munyń bári zańǵa qaishy», - dedi ol búgin Ortalyq kommýnikatsiialar qyzmetindegi baspasóz máslihatynda.
Onyń atap ótýinshe, elimizdiń Konstitýtsiiasynda naqty isterdi qaraý kezinde sýdia táýelsiz jáne oǵan eshkimniń quqyǵy joq ekendigi jazylǵan.
«Mundai aralasý bolǵan jaǵdaida zańymyzda shara qoldanylatyndyǵy kórsetilgen. Biraq, bul zań ázirge álsiz bolyp turǵan siiaqty. Azamattardyń sóz bostandyǵyn jaqsy túsinemiz. Alaida, sóz bostandyǵyn jeleý qylyp, sýdialardyń táýelsizdigine qol suǵýǵa bolmaidy», - dedi Aidos Sádýaqasov.
