Egis alqaptarynda sýdyń tapshylyǵy 11,7 tekshe shaqyrymdy quraýy múmkin. Bul týraly Úkimet otyrysynda Ekologiia, geologiia jáne tabiǵi resýrstar ministri Maǵzum Myrzaǵaliev aitty, dep habarlaidy QazAqparat.
«Elbasy Nursultan Nazarbaev 2025 jylǵa qarai sýarmaly jer kólemin 2,2 mln gektarǵa deiin jetkizý mindetin qoiǵany belgili. Memleket basshysy Qasym-Jomart Toqaev 2030 jylǵa deiin sýarmaly jer kólemin úsh million gektarǵa deiin jetkizýdi tapsyrdy. Bizdiń esepteýlerimizge sáikes, sý tutynýdyń aǵymdaǵy úrdisi 1,5 mln gektarǵa (13,3 km3) saqtalsa, boljamdy tapshylyq 2030 jylǵa qarai 11,7 tekshe shaqyrymdy quraýy múmkin. Osyǵan bailanysty, qazirdiń ózinde sýdy paidalanýdy qysqartý boiynsha sharalardy júzege asyrý qajet», - dedi ministr.
Onyń aitýynsha, sý tapshylyǵyn boldyrmaý maqsatynda kúrish egisin 29 myń gektarǵa, atap aitqanda Qyzylorda (15 myń ga), Almaty (10 myń ga) jáne Túrkistan (4 myń ga) oblystarynda azaitý qajet. Bul bir tekshe shaqyrym sýdy únemdeýge múmkindik beredi.
«Ekinshiden, keminde 750 myń gektar alańda sýarýdyń sý únemdeýshi tehnologiialaryn engizýdi jalǵastyrý kerek. Bul ortasha alǵanda 30%-ǵa deiin nemese 2,2 tekshe shaqyrym sýdy únemdeýge múmkindik beredi. Úshinshiden, uzyndyǵy 6 myń shaqyrym sýarý jelilerin qaita jańartý jáne 119 negizgi magistraldyq kanaldarda tsifrlandyrýdy jappai engizý esebinen jylyna 2 tekshe shaqyrym sý únemdeledi. Osy qajettilikterge aldaǵy bes jylda respýblikalyq biýdjetten jáne halyqaralyq qarjy uiymdarynan 192 mlrd teńge jumsalatyn bolady», - dedi Myrzaǵaliev.
Tórtinshiden, 10 jyl ishinde 3,6 tekshe shaqyrym kóleminde sý jinaqtaý úshin 39 jańa sý qoimasy salynady. Ol 70 eldi meken jáne 137 myń adam úshin sý tasqyny qubylystarynyń qaýpin azaitýǵa múmkindik beredi.
«394 myń gektar jańa sýarmaly jer sý kózimen qamtamasyz etiledi. Bul aýyl sharýashylyǵynda 129 myńnan astam jumys ornyn qurýǵa múmkindik beredi. Búginde Túrkistan oblysynda Keńsai-Qosqorǵan-2 sý qoimasynyń qurylysy júrgizilýde. 28 sý qoimasy boiynsha tehnikalyq-ekonomikalyq negizdeme jáne úsh sý qoimasy boiynsha jobalyq-smetalyq qujattama ázirlenip jatyr», - dedi vedomstvo basshysy.
Joǵaryda atalǵan is-sharalardy sátti iske asyrǵan jaǵdaida 8,8 tekshe shaqyrym sýdy qosymsha shoǵyrlandyrýǵa múmkindik paida bolady. Aǵymdaǵy limiti on bes tekshe shaqyrym bolatyn paidalanylatyn sýdy eskersek, qorytyndy balans 23,8 tekshe shaqyrymǵa teń bolady.
