Sýret: ashyq derekkózden
Búgingi úkimet otyrysynda oqý-aǵartý ministri Ǵani Beisembaev sý tasqynynan zardap shekken úsh óńirdegi 3,5 myńnan astam oqýshy aralyq jáne qorytyndy emtihan tapsyrmaitynyn aitty.
Olardyń qatarynda Atyraý, Aqtóbe jáne Soltústik Qazaqstan oblystarynyń bilim alýshylary bar. Oqýshylardyń qorytyndy baǵasy jyldyq baǵalary negizinde shyǵarylady.
"Sý tasqynynan zardap shekken jáne aýa raiynyń qolaisyzdyǵyna bailanysty qys mezgilinde qashyqtan oqyǵan 2622 mekteptiń 832 myń oqýshysy úshin 27-31 mamyr aralyǵynda "Jazǵy mektep" jumysy uiymdastyrylady. Jazǵy mektepti uiymdastyrýdyń negizgi maqsaty – oqýshy bilimindegi olqylyqtardyń ornyn toltyrý arqyly bilim sapasyn arttyrýǵa baǵyttalǵan", - dedi oqý-aǵartý ministri.
Aita keteiik, biyl 3,8 mln oqýshy kezekti oqý jylyn aiaqtaidy. 9 jáne 11-synyp bitirýshiler úshin qorytyndy emtihan 29 mamyr-11 maýsym aralyǵynda ótedi.
Sondai-aq, biyl alǵash ret 5-8, 10-synyptarda qazaq tilin meńgerýdi baǵalaý maqsatynda qazaq tilinde jáne basqa tilde oqytatyn mektepterdiń bilim alýshylary úshin aralyq emtihandar ótkiziledi.
Ǵani Beisembaev sonymen qatar sý tasqynynan zardap shekken óńirlerdegi 3800-den astam bala saýyqtyrý ortalyǵyna jiberiletinin málimdedi.
"Sý tasqynynan zardap shekken óńirlerdegi balalardyń demalysy erekshe nazarda. Búgingi kúni 628 bala demalyp jatyr. Aldaǵy ýaqytta 3 883 bala saýyqtyrý ortalyqtaryna joldanady", - dedi oqý-aǵartý ministri úkimettiń búgingi otyrysynda.
Sonymen birge, "Qazaqstan halqyna" qorynyń qoldaýymen 20 myń bala tegin demalýǵa múmkindik aldy.
Onyń ishinde sý tasqynynan zardap shekken óńirlerdiń oqýshylaryna, halyqtyń áleýmettik osal toptarynan jáne kóp balaly otbasynan shyqqan aýyl balalaryna basymdyq beriledi.
Biyl elimizdegi 10 myńnan astam demalys ornynda 3 mln-ǵa jýyq bala jazǵy demalysyn ótkizedi.
Ministrdiń aitýynsha, jazǵy demalysty mazmundy uiymdastyrý maqsatynda 120 myń uiymdastyrýshy-pedagog arnaiy daiyndyqtan ótken. Oǵan qosymsha 12 myńnan astam stýdent pen eriktiler tartylady.
