Maqtaaral aýdanyndaǵy topan sýdan zardap shekken aýyldardyń balalary emdik-saýyqtyrý shipajaiyna attandy. Jetkinshekter dárigerlik esepte turǵan jáne kópbalaly otbasynan shyqqan, dep habarlaidy "Ult aqparat".
Igilikti iske Túrkistan oblystyq qoǵamdyq densaýlyq basqarmasy uiytqy bolyp otyr. Jeńis, Nurly jol, Jantaqsai, Jańa turmys, Órgebas, Ferdaýsi eldimekenderinde turatyn oqýshylardi jetkizý birqatar meditsina qyzmetkerlerine júkteldi. Iaǵni, oqýshylardy shyǵaryp salý úshin barlyq qaýipsizdik sharalary qolǵa alynyp, jol politsiiasy men jedel járdem qyzmeti de jumyldyrylǵan.
Oqýshylardy shyǵaryp salý sharasyna qatysqan Maqtaaral aýdandyq bilim bóliminiń basshysy Muratbek Serikbaev balalardyń qashyqtyqtan oqytylatynyn jáne esh kedergisiz oqý jylyn aiaqtap shyǵatynyn atap ótti.
Aita keteiik, qazirgi tańda topan sýdan zardap shekken 5 aýyldyń 2600-den asa turǵyny Atakent kentindegi 8 evakýatsiialyq pýnktige jaiǵasqan. Onyń ishinde 770-i - mektep oqýshylary bolsa, 256-sy - mektep jasyna jetpegen búldirshinder. Qalǵan evakýatsiialanǵan turǵyndar aǵaiyn-týystarynyń úinde turyp jatyr.
Sý tasqynynan zardap shekken turǵyndardyń baspanasy tolyq bitip, jańa qonysqa jaiǵasqansha olardyń balalary elimizdegi demalys-saýyqtyrý lagerlerine joldaý josparlanyp otyr.
Búgin 152 oqýshydan bólek, evakýatsiialanǵan turǵyndardyń arasynan 47 zeinetker men sozylmaly aýrýy bar bir top naýqas «Birkólik» ońaltý keshenine demalysqa jiberildi. Aldaǵy eki aptada olarǵa da em-dom sharalary kórsetilmek.
