Foto: Májilistiń baspasóz qyzmeti
Májilis spikeri, «AMANAT» partiiasynyń Tóraǵasy Erlan Qoshanov bastaǵan depýtattar toby Qaraǵandy oblysyna keldi. Ol áleýmettik nysandar men kásiporyndardyń jumysymen tanysyp, óńir turǵyndarymen kezdesti. Nysandardy aralaý jumysyna Tótenshe jaǵdailar ministri Shyńǵys Árinov pen oblys ákimi Ermaǵanbet Bólekpaev ta qatysty, -dep habarlaidy "Ult Aqparat".
Májilistiń baspasóz qyzmeti taratqan aqparat boiynsha, tóraǵa «Qarmet» AQ Kómir departamentindegi jańa dispetcherlik-saraptamalyq ortalyqtyń jumysymen tanysty. Onda qandai mindetter atqarylatynyn kompaniianyń quryltaishysy Andrei Lavrentev pen bas direktor Vadim Basin kórsetti. Bul nysan óndiristik qaýipsizdikti baqylaýǵa jaýap beredi, onyń ishinde ottegi deńgeii men metan kontsentratsiiasyn ólsheý jumystary da bar. Mamandar shahtalardyń jaǵdaiyn táýlik boiy baqylaidy jáne kez kelgen qyzmetkermen bailanysqa shyǵa alady.
«Qarmet»-tiń qazaqstandyq kompaniianyń menshigine qaitarylǵany Qaraǵandy úshin ǵana emes, búkil el úshin mańyzdy oqiǵa bolǵany belgili. Bul Memleket basshysynyń mańyzdy saiasi sheshimi boldy. Jańa investor óndiristi keshendi túrde jańǵyrtýǵa mindetti. Bes jyl ishinde kombinat metallýrgiia kóshbasshysy statýsyn qaitarýy kerek. Bul rette eńbek qaýipsizdigi men ónerkásiptik qaýipsizdikti kúsheitý qajet. Eń bastysy – bizdiń jumysshylarymyzdyń ómiri men densaýlyǵyn saqtaý. Apattar men jazataiym oqiǵalar bolmaýy kerek», – dedi Erlan Qoshanov.
«AMANAT» Tóraǵasy kásipodaq múshelerimen kezdesý barysynda jumysshylar men shahterlerge memleket tarapynan áleýmettik qoldaýdy kúsheitý máselelerin talqylady. Parlament depýtattarynyń, «AMANAT» partiiasynyń jáne Úkimettiń birlesken kúsh-jigerimen Eńbek gigienasy men kásibi aýrýlar ǵylymi institýty qaita qurylyp, jumysshyǵa jazataiym oqiǵalar kezinde kináli bolýyna qaramastan tolyq saqtandyrý tólemin qamtamasyz etetin jańa zańdar qabyldandy.
Sondai-aq kezdesýde eńbek jaǵdailary ziiandy óndiris jumysshylaryna 55 jastan bastap arnaiy áleýmettik tólem alý múmkindigin beretin jańa zańǵa erekshe nazar aýdaryldy. Kómirshiler kásipodaq uiymynyń Tóraǵasy Evgenii Býslaev jańa múmkindikti «Qarmet» AQ-nyń 800-den astam qyzmetkeri paidalanǵanyn atap ótti. Búginde búkil el boiynsha tólemderdi 8 myńnan astam adam alýda. Ol bul zańnyń eńbek adamdaryn qoldaýdaǵy memlekettiń naqty qadamy ekenin aityp, onyń jedel qabyldanǵany úshin Prezidentke jáne «AMANAT» partiiasyna alǵysyn bildirdi.
Budan bólek, Májilis spikeri Buqar-Jyraý aýdanyndaǵy Sadovoe jáne Chkalov aýyldaryna baryp, sý tasqynynan keiingi qorǵanys bógetterin qalpyna keltirý jumystarymen tanysty. 2017 jyly osy aýyldardyń ainalasynda jartastan jasalǵan bógetter salyndy. Abyroi bolǵanda, ol biyl bul eldi mekenderdi sý tasqynynan qorǵap qaldy.
Alaida aýylda sý tasqyny máselesi sheshilgenimen, jergilikti aqsaqal Sailaýhan Shoshinniń aitýynsha, turǵyndardyń mal jaiatyn jerleri joq. Óz kezeginde «AMANAT» Tóraǵasy partiialyq «Jer amanaty» komissiiasynyń jumysy týraly aitty. Joba arqasynda eki jyl ishinde 10,8 million gektardan astam zańsyz iemdengen jaiylym jer memleket menshiginine qaitaryldy. Jeke qosalqy sharýashylyqtarǵa kómek kórsetý úshin Memleket basshysynyń tapsyrmasymen «Jaiylymdar týraly» zań qabyldandy. Bul zań qoǵamdyq jaiylymdar týraly jańa normalardy engizedi, iaǵni jaiylymdardy konkýrssyz bólýge, jaiylymdardy basqa aýyl sharýashylyǵy alqaptaryna ainaldyrýǵa tyiym salady jáne bir gektarǵa mal jaiý normativin 20-dan 50-ge deiin arttyrady.
Qaraǵandyda Erlan Qoshanov memlekettik jáne servistik qyzmet kórsetý ortalyǵyna bardy. Onda ótken jyldyń qazan aiynda eldegi alǵashqy áielderge arnalǵan politsiia ýchaskesi ashyldy. Ol fýnktsionaldy túrde otbasyna kómek kórsetýdiń biryńǵai ortalyǵyna ainaldy. Bul jerde turmystyq zorlyq-zombylyq qurbandaryna keshendi kómek kórsetiledi. Ortalyqta psihologtar, zańgerler, sot oryndaýshylary, iývenaldy politsiia, teologtar, volonterler, mediatorlar, áleýmettik qyzmetkerler jáne basqalar jumys isteidi. Májilis Tóraǵasy Qaraǵandy oblysynyń tájiribesin oń baǵalap, mundai jobany elimizdiń basqa óńirlerinde de engizýdi usyndy.
Dál osy kúni Májilis spikeri Kúngei shaǵyn aýdanynda 600 oryndyq mektep qurylysynyń barysymen tanysty. Bilim uiasy «AMANAT» partiiasynyń respýblikalyq sailaýaldy baǵdarlamasyn iske asyrý jónindegi Jol kartasy aiasynda salynyp jatyr. Jergilikti belsendiler qalanyń osy bóliginde mekteptiń joqtyǵy týraly máseleni kópten beri kóterip kelgen. Barlyq jumystardy osy jyldyń sońyna deiin aiaqtaý josparlanyp otyr.
Sondai-aq Májilis Tóraǵasy Qaraǵandynyń jylý jelilerin jańǵyrtý jumystarymen tanysty. Jańa magistral jylý qýatynyń tapshylyǵy máselesin sheshedi jáne qalanyń qoldanystaǵy jelilerine túsetin aýyrtpalyqty azaitady. Bul shahardyń odan ári damýy úshin qajetti qordy qurýǵa múmkindik beredi. Joba 2024 jyldyń kúzine deiin tolyq júzege asyrylady.
