Foto: Prezidenttiń baspasóz qyzmeti
Qazaqstan úkimeti aýqymdy sý tasqynynan zardap shekken azamattarǵa keltirilgen shyǵyndy óteý jumystaryn jalǵastyrýda, dep habarlaidy «Ult aqparat».
Úkimet taratqan málimetke súiensek, búgingi kúni 29 625 otbasy 10,7 mlrd teńgeden astam somaǵa 100 AEK mólsherinde birjolǵy tólem aldy, barlyǵy 30 912 ótinim qabyldandy. Atalǵan jumystar Qostanai, Aqtóbe, Aqmola, Batys Qazaqstan, Qaraǵandy, Pavlodar, Abai jáne Ulytaý oblystarynda tolyǵymen aiaqtaldy. Jumys Atyraý jáne Soltústik Qazaqstan oblystarynda jalǵasýda.
"Zardap shekken óńirlerde 8 863 nysan boiynsha zalaldy baǵalaý jumystary aiaqtaldy. 356 otbasy jańa úiler men páterlerge ie boldy. 1 472 úi salynyp jatyr. 1 389 úide jóndeý jumystaryn júrgizýge 5,2 mlrd teńgeden astam qarajat bólindi. 3 804 otbasy materialdyq shyǵyn úshin jalpy somasy 657 mln teńgege ótemaqy aldy", - delingen habarlamada.
Aita ketý kerek, mal shyǵyny úshin berilgen tólem kólemi 1,6 mlrd teńgege jetti. Keltirilgen ziiandy óteý jumystary jalǵasýda jáne turaqty baqylaýǵa alynǵan.
