QR Premer-Ministri Asqar Maminniń tóraǵalyǵymen ótken Úkimet otyrysynda ishki ister ministri Erlan Turǵymbaev aldaǵy sý tasqyny kezeńine daiyndyq, sý tasqyny aldyndaǵy jaǵdai jáne sý tasqyny qateriniń aldyn alý jáne ony joiý boiynsha qabyldanyp jatqan sharalar týraly aityp berdi, dep habarlaidy "Ult aqparat" primeminister.kz saityna silteme jasap.
E. Turǵymbaev atap ótkendei, QR IIM ministrlik ortalyq jáne jergilikti atqarýshy organdarmen birlesip kóktemgi sý tasqyny kezeńinde tótenshe jaǵdailardyń týyndaý qaýpin azaitý boiynsha is-sharalar keshenin júrgizýde.
«Qazgidromet» RMK-nyń aldyn ala boljam derekteri boiynsha eldegi qar qory men ózender basseinderindegi ylǵal qorynyń kólemi normadan aitarlyqtai joǵary. Qar basý protsesi jalǵasýda. Nur-Sultan qalasynda, Shyǵys Qazaqstan jáne Soltústik Qazaqstan oblystarynda jaǵdaidyń qiyndaýy óte yqtimal.
«Qazir elimizde 609 eldi mekendi jáne 675 avtomobil jolyn jáne 259 temir joldy sý basý qaýpi bar», — dedi ministr.
Sý basýdy boldyrmaý maqsatynda jergilikti atqarýshy organdar eldi mekenderden 8,8 mln tekshe metrden asa qar shyǵardy, JJM (qazir – 13,5 myń tonna), inertti materialdar (152,6 myń tonna), qum salynǵan qaptar (840 myń) men jarylǵyshtar (47 tonna) qory qalyptastyryldy.
Tótenshe rezervterde 34 mlrd teńge kózdelgen.
Yqtimal sý basý jaǵdaiyna evakýatsiialanatyn halyqty qabyldaityn 1700 beket ázirlendi, marshrýttar jańartyldy, qajetti kólik bólindi. Tirshilikti qamtamasyz etý úshin ákimdikter qajetti quraldardy (palatkalardy, tósekterdi), azyq-túlik pen aýyz sý qoryn daiyndady.
Sý tasqyny jaǵdaiynyń yqtimal qiyndaýyna jedel den qoiý maqsatynda ishki ister organdarynan jalpy sany 9 myń adam jáne 1730 birlik tehnikadan arnaiy kúshter men quraldar toptamalary quryldy.
Búginnen bastap (biylǵy 25-26 aqpanda) Nur-Sultan qalasynyń basqarý shtabymen «Kóktem-2020» respýblikalyq komandalyq-shtabtyq oqý-jattyǵý ótkizile bastady, onyń barysynda jumyldyrylǵan kúshterdiń ázirligi tekseriletin bolady.
Sý tasqyny qaterleriniń aldyn alý jáne olardy joiý jónindegi 2017-2020 jyldarǵa arnalǵan Jol kartasy iske asyrylýda, bul ótken 3 jyl ishinde 437 eldi mekende sý basý qaýpin boldyrmaýǵa jáne 287 eldi mekende sý basý qaýip-qaterin barynsha azaitýǵa múmkindik berdi.
Materialdyq-tehnikalyq jaraqtaý boiynsha Jol kartasy sheńberinde 900 birlik tehnika, onyń ishinde motopompalar, júzý quraldary, jol talǵamaityn quraldar satyp alyndy.
«Jalpy, biyl sý tasqynyna tolyq ázirlik týraly aitýǵa áli erte. Sý qorǵaý aimaqtary sheginde ornalasqan úilerdiń turǵyndaryn qaýipsiz ýchaskelerge kóshirý boiynsha josparlanǵan is-sharalar oryndalmai jatyr. Bul óte shyǵyndy is-shara ekeni sózsiz, alaida jumys istelinbese, saldary budan da aýqymdy bolýy múmkin», — dedi E. Turǵymbaev.
Sondai-aq 2019 jyly josparlanǵan 91 is-sharanyń 36-sy iske asyrylmai qaldy. 2020 jyly 132 is-sharanyń iske asyrylmaý qaýipi bar, solardyń 53 is-sharasy boiynsha respýblikalyq biýdjetten qarjylandyrý kózdelgen.
Osyǵan bailanysty QR IIM múddeli memlekettik jáne jergilikti atqarýshy organdarǵa josparlanǵan is-sharalardy júzege asyrý úshin qarajat qarastyrýdy, 2020 jyly Jol kartasynyń barlyq is-sharalaryn aiaqtaý jóninde qajetti sharalar qabyldaýdy jáne aýmaqtardy damytý josparlary sheńberinde jergilikti atqarýshy organdarǵa sý tasqyny qaýip-qaterleriniń aldyn alý jáne joiý jónindegi jumysty jalǵastyrýdy usynady.
Sondai-aq, erigen qar sýlarynyń basýyn boldyrmaý úshin eldi mekenderdi qardan tazartý boiynsha shuǵyl sharalar qabyldaý qajettiligi týraly aityldy. E. Turǵymbaev iesiz sý qoimalary men bógetterdi memlekettik menshikke aýystyrý máselelerine nazar aýdardy, olardyń kóbisi qanaǵattanarlyqsyz kúide.
«Sý tasqyny kezeńinde bizde sý qoimalarynda bos oryn bolýy tiis. Onsyz ózenderdiń qaýipsiz deńgeiin retteý múmkin emes», — dep atap ótti ministr.
Budan ózge, onyń aitýynsha, 463 gidrotehnikalyq qurylysty jóndeý qajettiligi týyndap otyr, oǵan qosa avtojol jáne temir jol ýchaskeleriniń sý basýyn aldyn alý boiynsha infraqurylymdyq obektilerdiń buzylýyn boldyrmaý jóninde qosymsha sharalar qabyldaý qajet.
Qorytyndylai kele, E. Turǵymbaev osy jylǵy 11 aqpanda Premer-Ministrdiń orynbasary R. Skliardyń tóraǵalyǵymen Tótenshe jaǵdailardyń aldyn alý jáne olardy joiý jónindegi vedomstvoaralyq memlekettik komissiianyń otyrysy ótkizilip, onda sý tasqyny kezeńine basqarý organdarynyń, azamattyq qorǵaý júiesiniń kúshteri men quraldary ázirliginiń jai-kúii qaralǵanyn atap ótti.
