Sý tasqynynyń aldyn alý jáne saldaryn joiýǵa respýblikalyq, jergilikti rezervten qosymsha qarajat shyǵyndalǵan joq. Bul týraly Ortalyq kommýnikatsiialar qyzmetindegi brifingte QR Ishki ister ministriniń orynbasary Iýrii Ilin aitty, dep habarlaidy QazAqparat.
«Sońǵy ýaqytta Aqmola, Shyǵys Qazaqstan, Qostanai jáne Soltústik Qazaqstan oblystary sý tasqyny qaýpine bailanysty baqylaýda bolǵan edi. Búginde Qostanai oblysynda sý tasý kezeńin eshqandai problemasyz ótkizdik dep aita alamyz. Aqmola oblysyndaǵy ahýal turaqtalyp, sý tasqynyń shyrqaý shegi artta qaldy. Sý tasqyny óńir aýmaǵynda kúrdeli jaǵdaida ótti. Nura ózeninen basqa barlyq sý tasqyny qaýpi bar ózenderde sý deńgeii syni deńgeiden joǵary boldy. Jergilikti, sonymen qatar memlekettik organdardyń tarapynan qabyldanǵan sharalardyń arqasynda Aqmola oblysynda turǵyn úilerdi sý basqan joq», - dedi ol.
Ministr orynbasarynyń atap ótýinshe, Soltústik Qazaqstan oblysynda Sergeev sý qoimasyndaǵy bógettiń jotasy arqyly quiylý 104 sm-dy quraidy. Al Petropavl sý qoimasy 114,7 paiyzǵa toldy. Bul rette Petropavl sý torabyna jaqyn jerde «Cheliabi-Novosibir» respýblikalyq mańyzy bar avtojoly ýchaskesinde jáne Zarechnyi kentindegi jergilikti mańyzy bar avtojol arqyly eki ret sý júrdi. Sonymen qatar Esil ózeniniń jaiylmasynda, qalanyń shetinde ornalasqan saiajai ýchaskelerin sý basý baiqalady.
«Shyǵys Qazaqstan oblysynda sý tasqyny jaǵdaiy turaqty. Sý tasqyny qaýpiniń ótken kezeńi týraly jalpy aitar bolsaq, sońǵy 3 jyl boiy júzege asyrylyp kele jatqan jol kartasy aitarlyqtai shyǵyn jumsamaýǵa sep boldy. Búgingi kúni tótenshe jaǵdaidyń aldyn alý jáne joiýǵa respýblikalyq ta, jergilikti de qosymsha qarajat bólingen joq», - dedi Iýrii Ilin.
