.jpeg)
Foto: primeminister.kz
Premer-Ministr, Sý tasqynyna qarsy is-sharalardy úilestirý jáne sý tasqyny zardaptaryn joiý jónindegi respýblikalyq shtabtyń basshysy Oljas Bektenov Aqtóbe oblysyndaǵy sý tasqynyna bailanysty jaǵdaidy tekserip, Memleket basshysynyń tapsyrmalarynyń jergilikti jerlerde oryndalý barysymen tanysty, dep habarlaidy «Ult aqparat» úkimettiń resmi saityna silteme jasap.
Atap aitqanda, birqatar sý qoimalaryn tikushaqpen aralap, sý tasqynynan zardap shekken úilerge bardy, sondai-aq ahýaldyq ortalyqtyń jumysymen tanysyp, respýblikalyq shtabtyń otyrysyn ótkizdi.
Sol jerde Oljas Bektenov sý basqan úilerdiń jai-kúiin qarap, turǵyndardyń baspanalaryn qalpyna keltirý jáne basqa da qosymsha qoldaý sharalaryn kórsetýge qatysty suraqtaryna jaýap berdi. Máselen, ákimdik tizimderi boiynsha sý tasqynynan zardap shekkender sanatyna jatqyzylǵan barlyq azamattarǵa nesieler boiynsha jyldyń maýsym aiynyń sońyna deiin 3 aiǵa nesie tólemderin avtomatty túrde keiinge shegerý múmkindigi beriledi, sonymen qatar tólemderdi keshiktirgeni úshin aiyppuldar men ósimpuldar salynbaidy.
Jalpy oblysta tasqyn qaýpi áli seiilmegen. Qazir ózenderdiń kópshiliginde sý arnasynan asyp ketkeli tur. Óńirde 772 úi sý astynda qaldy. Oblystyń 5 aýdanynda (Qobda, Muǵaljar, Temir, Áiteke bi, Oiyl) jáne Aqtóbe qalasynda jergilikti aýqymdaǵy tabiǵi sipattaǵy tótenshe jaǵdai jariialandy. Sý tasqynyna qarsy is-sharalarǵa jeke quramnan 3140 adam, 664 tehnika jumyldyryldy. Barlyǵy 8 763 adam qaýipsiz jerge kóshirildi.
Oljas Bektenov kólemi 15,8 mln m3 bolatyn Maǵadjan bógetin aralap kórdi, onda qarǵyn sý aǵyny saldarynan Maǵadjan sý qoimasynyń bógeti buzyldy. 1985 jyly paidalanýǵa berilgen. Gidrotehnikalyq qurylys jekemenshik "Tulpar" JShS kompaniiasynyń ieliginde. Qyzyltý aýylynan 25 adam, Tabantal qystaǵynan 11 adam evakýatsiialandy.
Sonymen qatar boljamdarǵa sáikes, 5-11 sáýir aralyǵynda oblystyń barlyq aýmaǵynda aýa temperatýrasy aitarlyqtai jylynýy múmkin, qatty jaýyn-shashyn kútilmeidi. Osyǵan bailanysty sý tasqynynan zardap shekken aýyldarmen qatar, qaita sý alyp ketý qaýpi joq aimaqtardaǵy eldi mekenderdiń tynys-tirshiligin de qalpyna keltirýge nazar aýdaryldy.
Máselen, qazirdiń ózinde 26 eldi mekende elektr qýatymen jabdyqtaý qalpyna keltirildi. "Energojúie" JShS-niń barlyq bólimsheleri kúsheitilgen rejimde jumys isteýde. Respýblikalyq mańyzy bar 9, oblystyq mańyzy bar – 3 jolda jáne 9 aýdandyq mańyzy bar jolda sýdyń toqtaýyna bailanysty kólik qozǵalysyna qoiylǵan shekteýler alynyp tastaldy. Óńirde shyǵyndy óteý komissiiasy jumys isteidi. Úsh kún ishinde komissiiaǵa materialdyq shyǵyndardy óteý týraly 1623 ótinish túsken. Algoritmge sáikes, TJ oryn alǵan kúnnen bastap kúntizbelik 30 kún ishinde keltirilgen shyǵyndy óteý týraly jergilikti ákimdikterge ótinish beriledi. Sonymen qatar Aqtóbe oblysynda sý tasqynynan zardap shekken jáne qiyn jaǵdaiǵa tap bolǵan turǵyndar ákimdikke tiisti ótinishpen júginý arqyly bir rettik tólem ala alady.
Oljas Bektenov oblys ákimdiginiń ahýaldyq ortalyǵynda boldy. Ahýaldyq ortalyqtyń operatorlary "109" qysqa nómiri boiynsha táýlik boiy jumys isteitin Call-ortalyq arqyly halyqpen bailanysta bolady. Sý tasqynyna qarsy is-sharalar bastalǵannan beri 109 ahýaldyq ortalyǵyna 15 myńnan astam qońyraý túsken. 12 293 ótinim tirkeldi. Ahýaldyq ortalyq kúsheitilgen rejimde jumys isteýde, oǵan TJ jáne sý tasqynyna qarsy shtab qyzmetteri qosylǵan.
Qorytyndy boiynsha Úkimet basshysy Oljas Bektenov sý tasqyny saldaryn joiǵannan keiin kommýnaldyq jáne jeke menshiktegi gidrotehnikalyq qurylystarda jan-jaqty tekserýler júrgizýdi tapsyrdy. Aqtóbe oblysynda barlyǵy 206 gidrotehnikalyq qurylys bar.
