Aqtóbede ózender tasyp, barlyǵy 77 úi qulap qaldy. Sý tasqyny kezinde 20 adam aýrýhanaǵa tústi, dep habarlaidy QazAqparat tilshisi.
Aqtóbe qalasyndaǵy Qarǵaly, Sazdy, Aqtóbe sý qoimalary lyq tolyp, Elek, Qarǵaly, Jińishke ózenderi arnasynan tasyǵan kezde 2 myńǵa jýyq adam dalada qalǵan bolatyn. Qala ishinde barlyǵy 9 mektepte ýaqytsha beket ashylyp, 800-ge jýyq adam bilim ordasyn panalady. Al búgin qalalyq ákimdiktiń áleýmettik komissiiasy olardyń bári páterlerge, týǵan-týystaryna jiberilgenin málimdedi.
«Úii sý astynda qalǵandar jerde jatpasyn dep oblystyq densaýlyq saqtaý basqarmasy kereýettermen qamtamasyz etti. Eriktiler óte jaqsy jumys istedi. Osy ýaqyt aralyǵynda úsh bala ómirge keldi. Olardyń bireýi perzenthanadan shyqty. Al 10 bala «Aqbóbek» saýyqtyrý ortalyǵyna, 20 adam qaladaǵy emdeý oryndaryna jatqyzyldy. Keibiriniń qan qysymy kóterilip, júregi aýyrdy. Juqpaly aýrýǵa shaldyqqandar da bar eken», - dedi qalalyq máslihat hatshysy Sulýpan Shyntasova.
Sý tasqyny kezinde barlyǵy 785 adam, iaǵni, 177 otbasy mektepterge jatqyzyldy. Al 819 adam týǵan-týysy men dostaryn panalady.
«Qalada shyǵyndy esepteý úshin 7 mobildi top jumys istep jatyr. Olardyń janynda táýelsiz baǵalaýshylar bar. Barlyǵy 77 úi qulady. Ony qaita qalpyna keltirý múmkin emes. Úidiń teń jartysy qulap turǵan jaǵdailar da kezikti. Kóbi Qisyqkól men Mahambetovka aýylynda. Úiler saman kirpishten salynǵan. Shynyn aitqanda, turmystyq tehnikanyń bári sý ishinde qalǵan. Atqarýshy organ eń bolmaǵanda tońazytqysh, gaz plitasy sekildi asa qajet tehnikany satyp alyp berýdi josparlap otyr. Baspanasyz qalǵandardyń 30 paiyzy sol aýmaqtardy páter jaldap júrgender», - dedi S.Shyntasova.
Aita keteiik, arnaiy qurylǵan «Qolǵanat Aqtóbe» qoryna bir apta ishinde 11 million teńgeden astam qarjy tústi. Buǵan deiin habarlaǵanymyzdai, mektepterge ýaqytsha qonystanǵan 110 otbasynyń árqaisysyna 30 myń teńge berildi. Qazir qordyń qarjysy 3 million teńgege azaiyp qaldy.
