Atyraý oblysynyń Saǵyz aýylynda úilerdi sý basý qaýpi týyndady, dep habarlady QazAqparat.
Oblystyq tótenshe jaǵdailar departamenti baspasóz qyzmetiniń málimetinshe, 29 naýryzda 23:00-de Saǵyz stansasynyń turǵynynan Noǵaity ózeninde sý tasý qaýpi tóngeni týraly habar túsken.
Osyǵan bailanysty №12 órt sóndirý bóliminiń qyzmetkerleri oqiǵa ornyna baryp, Noǵaity ózeninde sý deńgeii kóterilip, arnasynan asqanyn anyqtaǵan.
«Sonyń saldarynan ózen irgesine taiaý ornalasqan turǵyn úilerdi sý basý qaýpi týyndady. Sý basý qaýpi tóngen turǵyn úiler mańyna qum tóseý arqyly bóget ornatyldy. Bóget ornatý jumystaryn júrgizýge №12 órt sóndirý bóliminen 6 qyzmetker men 1 tehnika, Saǵyz aýyldyq okrýgi ákimdiginen 25 adam men 2 tehnika, Qyzylqoǵa agrarly tehnikalyq kollejinen 1 adam men 1 tehnika, eriktilerden 2 adam men 2 tehnika jumyldyryldy», -dep habarlady departamenttiń baspasóz qyzmeti.
Qyzylqoǵa aýdandyq ákimdiginiń málimetinshe, Saǵyz aýylynda Noǵaity ózenine taiaý ornalasqan úilerdegi turǵyndardy №9 mektep pen agrarly tehnikalyq kolledjge evakýatsiialaý júrip jatyr.
