اتىراۋ وبلىسىنىڭ ساعىز اۋىلىندا ٷيلەردٸ سۋ باسۋ قاۋپٸ تۋىندادى, دەپ حابارلادى قازاقپارات.
وبلىستىق تٶتەنشە جاعدايلار دەپارتامەنتٸ باسپاسٶز قىزمەتٸنٸڭ مەلٸمەتٸنشە, 29 ناۋرىزدا 23:00-دە ساعىز ستانساسىنىڭ تۇرعىنىنان نوعايتى ٶزەنٸندە سۋ تاسۋ قاۋپٸ تٶنگەنٸ تۋرالى حابار تٷسكەن.
وسىعان بايلانىستى №12 ٶرت سٶندٸرۋ بٶلٸمٸنٸڭ قىزمەتكەرلەرٸ وقيعا ورنىنا بارىپ, نوعايتى ٶزەنٸندە سۋ دەڭگەيٸ كٶتەرٸلٸپ, ارناسىنان اسقانىن انىقتاعان.
«سونىڭ سالدارىنان ٶزەن ٸرگەسٸنە تاياۋ ورنالاسقان تۇرعىن ٷيلەردٸ سۋ باسۋ قاۋپٸ تۋىندادى. سۋ باسۋ قاۋپٸ تٶنگەن تۇرعىن ٷيلەر ماڭىنا قۇم تٶسەۋ ارقىلى بٶگەت ورناتىلدى. بٶگەت ورناتۋ جۇمىستارىن جٷرگٸزۋگە №12 ٶرت سٶندٸرۋ بٶلٸمٸنەن 6 قىزمەتكەر مەن 1 تەحنيكا, ساعىز اۋىلدىق وكرۋگٸ ەكٸمدٸگٸنەن 25 ادام مەن 2 تەحنيكا, قىزىلقوعا اگرارلى تەحنيكالىق كوللەجٸنەن 1 ادام مەن 1 تەحنيكا, ەرٸكتٸلەردەن 2 ادام مەن 2 تەحنيكا جۇمىلدىرىلدى», -دەپ حابارلادى دەپارتامەنتتٸڭ باسپاسٶز قىزمەتٸ.
قىزىلقوعا اۋداندىق ەكٸمدٸگٸنٸڭ مەلٸمەتٸنشە, ساعىز اۋىلىندا نوعايتى ٶزەنٸنە تاياۋ ورنالاسقان ٷيلەردەگٸ تۇرعىنداردى №9 مەكتەپ پەن اگرارلى تەحنيكالىق كوللەدجگە ەۆاكۋاتسييالاۋ جٷرٸپ جاتىر.
