Memleket basshysy Ekologiia, geologiia jáne tabiǵi resýrstar ministri Serikqali Brekeshevti qabyldady, dep habarlaidy Aqorda.
Qasym-Jomart Toqaevqa ministrliktiń aldaǵy ýaqyttaǵy josparlary jáne Prezidenttiń halyqqa Joldaýynda bergen tapsyrmalarynyń oryndalýy týraly baiandaldy.
Atap aitqanda, Serikqali Brekeshev Memleket basshysyna Ulttyq geologiialyq qyzmet qurýǵa qatysty jumystar, «Mineraldyq resýrstardyń ulttyq derekter banki» aqparattyq júiesiniń ázirlenýi jóninde málimet berdi.
Prezidentke sý sharýashylyǵyn damytý jónindegi tapsyrmalarynyń oryndalý barysy týraly baiandaldy. Ministrdiń aitýynsha, bes jyldyń ishinde sýarý jelisiniń keminde 120 arnasy qalpyna keltirilip, jalpy kólemi 1,7 milliard tekshe metr bolatyn jańadan toǵyz sý qoimasy salynady.
Qasym-Jomart Toqaev sý únemdeý tehnologiialaryn engizý isin yntalandyrý jáne sý salasyn tsifrlandyrý qajet ekenin atap ótti.
Kezdesý barysynda atmosferalyq aýanyń lastanýyn azaitý baǵytynda qabyldanyp jatqan sharalarǵa erekshe mán berildi. Vedomstvo basshysynyń aitýynsha, ekologiialyq jaǵdaidy jaqsartý maqsatynda aimaqtar boiynsha jol kartalary bekitilip, «Jasyl Qazaqstan» ulttyq jobasy ázirlendi jáne kásiporyndarmen birqatar memorandýmǵa qol qoiyldy. Atalǵan qujattar qaldyqtardyń kólemin 20-dan 30 paiyzǵa qysqartýǵa múmkindik beredi.
Kezdesý sońynda Memleket basshysy jańadan taǵaiyndalǵan ministrge birqatar naqty tapsyrma berdi.
