Foto: Pexels.com
Qazaqstanda sý resýrstary salasyna maman daiarlaý baǵytynda naqty qadamdar jasalyp jatyr. 2025–2026 oqý jylynda sý sharýashylyǵy boiynsha stýdentterge bólinetin bilim granttarynyń sany 70%-ǵa ósip, 1052-ge jetti. Bul kórsetkish ótken oqý jylyndaǵy 618 grantpen salystyrǵanda aitarlyqtai joǵary, dep habarlaidy Ult.kz.
Gidrogeologiia men gidrologiia siiaqty pánaralyq baǵyttardy eseptemegende, bul granttar tikelei sý salasyna mamandanǵan mamandardy oqytýǵa baǵyttalǵan.
Salaǵa qyzyǵýshylyqtyń artyp kele jatqanyn kórsetetin taǵy bir derek – óndiristik tájiribeden ótken stýdentter sany. Byltyrǵy 82 stýdentpen salystyrǵanda, biyl bul kórsetkish 339-ǵa jetken.
Sondai-aq, jańa oqý jylynan bastap Jáńgir han atyndaǵy Batys Qazaqstan agrarlyq-tehnikalyq ýniversiteti alǵash ret «Gidromelioratsiia» mamandyǵy boiynsha stýdentter qabyldaidy. Bul – sý salasy boiynsha bilim beretin joǵary oqý oryndarynyń sany artyp kele jatqanyn bildiredi.
Sý resýrstary jáne irrigatsiia ministrliginiń Ǵylym jáne innovatsiialar departamentiniń direktory Lazzat Júsipovanyń aitýynsha, bul – Memleket basshysynyń sý salasyna jańa, bilikti mamandar daiarlaý jónindegi tapsyrmasyn oryndaýdyń mańyzdy kezeńi.
«Granttar sanynyń artýy – osy baǵyttaǵy naqty qadam. Sonymen qatar, ministrlik mamandyqtyń tartymdylyǵyn arttyrý maqsatynda eńbekaqyny kóterý jáne ózge de qoldaý sharalaryn qolǵa alyp jatyr», – dedi vedomstvo ókili.
Búgingi tańda sý tapshylyǵy, klimattyń ózgerýi jáne irrigatsiialyq júielerdi jańǵyrtý – el damýy úshin ózekti máselelerdiń biri. Osy turǵyda kásibi kadrlardyń mańyzy zor.
Oqi otyryńyz: "Dene shynyqtyrý mamandary suranysta bolady" – IT mamany ata-analarǵa keńes berdi
