Foto: egemen.kz
Sý resýrstary jáne irrigatsiia ministrligi Qazaqstannyń sý qoimalary men ózenderi kóktemgi sý tasqynyna daiyn ba degen suraqqa jaýap berdi, dep habarlaidy Kazinform agenttigi.
«2023 jyly ońtústik aimaqtarda vegetatsiia óte qurǵaq boldy. Sý tapshylyǵy baiqaldy. Elimizdiń ońtústigindegi barlyq derlik sý qoimasy paidasyz kólemge deiin jumys istedi. Qazgidromettiń kúzgi-qysqy boljamy boiynsha barlyq sý qoimamyz toltyrý rejiminde jumys istep jatyr. Qazirgi ýaqytta olar 60-70%-ǵa toldy. Bizdiń sý qoimalarymyz aǵyndy retteý úshin sý kólemin qabyldaýǵa daiyn», - dedi ministrliktiń Sý sharýashylyǵy komiteti tóraǵasynyń orynbasary Gúlmira Imasheva Sputnik Qazaqstan mýltimediialyq baspasóz ortalyǵynda ótken dóńgelek ústelde.
Mysal retinde spiker tranzittik rejimde jumys isteitin Tasótkel sý qoimasyn aitty. Onyń qazirgi kólemi – 301 million tekshe metr.
«Kelip jatqan barlyq sý tómengi aǵysqa tógiledi. Osylaisha, biz tasqyn sýdy qabyldaýǵa daiyndalyp jatyrmyz», - dedi spiker.
Eń iri sý qoimalarynyń biri Shardaradaǵy sý kólemi búginde 2,5 tekshe shaqyrymdy quraidy. Ótken jyldyń dál osy kúni kólem 4,1 tekshe shaqyrym bolǵan edi.
«Sý tasqyny – tabiǵi protsess. Munyń bári aýa raiynyń qandai bolatynyna bailanysty. Biraq ministrlik pen aýmaqtyq bólimsheler tarapynan kúndelikti monitoring júrgiziledi. Biz sýdyń kólemi men aǵynyn baqylap otyrmyz. Barlyq iri sý qoimasynda vegetatsiialyq kezeńge arnalǵan jumys kestesi ázirlendi, onda biz 1 sáýirge, vegetatsiialyq kezeńniń bastalýyna qarai qajetti kólemdi jinaitynymyz jazylǵan», - dep tolyqtyrdy Gúlmira Imasheva.
