Stýdentterge sheteldik taǵylymdamadan ótý is-sharasy qaita bastalady. Bul týraly QR Bilim jáne ǵylym vitse-ministri Qýanysh Erǵaliev málim etti, dep habarlaidy QazAqparat.
«Stýdentter arasynda koronavirýs indetine qarsy vaktsina alýdyń mańyzdylyǵy týraly túsindirý jumystary júrgizildi. Sonymen qatar oqý aqysyna nemese jataqhanada turý aqysyna jeńildikter berilip jatyr. Qyzmetkerler úshin syiaqy jáne basqa da yntalandyrý sharalary qabyldanýda. Sanitarlyq normalardy saqtaýǵa erekshe nazar aýdarylatyn bolady. Aita ketý kerek, kópshilik is-sharalardy ótkizýge tyiym salynady. Sonymen birge jyljymaly sabaq kestesin belgileý josparlanyp otyr. Oqý barysynda «Bir aýditoriia – bir top» qaǵidasy qatań saqtalady. Aýditoriialardy jeldetý jáne sanitarlyq tazartý jumystary úshin úzilister de qarastyrylǵan», - dedi ol Ortalyq kommýnikatsiialar qyzmetindegi baspasóz máslihaty barysynda.
Onyń atap ótýinshe, juqpaly aýrý belgileri paida bolǵan jaǵdaida stýdentter oqýlaryn qashyqtan jalǵastyra alady.
«Budan basqa, epidemiologiialyq jaǵdai nasharlap, quzyrly organnyń tiisti sheshimi bolǵan jaǵdaida qashyqtan oqytý formatyna kóshý boiynsha daiyndyǵy pysyqtalýy tiis. Ýniversitetter oflain rejimnen onlain formatqa aýystyrý boiynsha arnaýly jospar, iaǵni algoritm daiyndaityn bolady. Jańa oqý jylynda bilim alýshylar úshin akademiialyq utqyrlyq baǵdarlamalary boiynsha bilim alý jáne sheteldik taǵylymdamalardan ótý is-sharalary qaita bastalady dep josparlap otyrmyz»,- dedi Qýanysh Erǵaliev.
