Stýdentterden PTR-test nátijesin talap etýge bolmaidy. Bul týraly QR Bilim jáne ǵylym vitse-ministri Qýanysh Erǵaliev málim etti, dep habarlaidy QazAqparat.
«Aldaǵy oqý jylynda elimizdiń joǵary oqý oryndarynda bilim alatyn stýdentter dástúrli formatta oqýdy bastaidy. Aita ketken jón, joǵary oqý oryndarynyń sheshimi boiynsha oqýdy aralas formatta da ótkizýge bolady. Iaǵni, dárister onlain, al seminarlyq, zerthanalyq jáne tájiribelik sabaqtar oflain rejimde uiymdastyrylady. Al, qashyqtan oqytý formaty erekshe bilim berý qajettilikteri bar jáne táýekel toptaǵy stýdentterge qatysty qoldanylýy múmkin», - dedi ol Ortalyq kommýnikatsiialar qyzmetindegi baspasóz máslihaty barysynda.
Onyń atap ótýinshe, stýdentter úshin oqý jylynyń bastalýy oqý kýrsyna qarai ózgerýi múmkin. Máselen, 3-4 kýrs bilim alýshylary úshin 1 qyrkúiekten bastalsa, al 1-2 kýrs jáne magistranttar úshin oqý ýniversitettiń akademiialyq kúntizbesine sáikes qyrkúiek aiynyń sońyna deiin bastala alady.
«Joǵary oqý ornynyń aýmaǵy, oqý korpýstary, kitaphana men jataqhanalarda mindetti túrde Ashyq qosymshasy qoldanylýy kerek. Oqý ǵimarattaryna «jasyl» nemese «kók» mártebesi bar bilim alýshylar kire alady. Oqý ǵimaraty ne jataqhanaǵa kirgen kezde termometrmen tekserip, antiseptik qoldaný mindetti bolady. Maska rejimi de qamtamasyz etiledi. Stýdentterden PTR-testileýdiń nátijesin talap etýge bolmaitynyn erekshe atap ótkim keledi», - dedi Qýanysh Erǵaliev.
