Kári orys musylman bolmaidy degen mátel bar. Jasy úlken adamnyń ózgermeitinin meńzese kerek. Olar jarty ǵasyr boiy qandai tárbie kórdi, sony jazady. Jańasha oilaý joq, qalyptasqan súrleýimen júredi. Al, jastardyń oiy móldir. Bylǵanbaǵan, tas bop qalyptaspaǵan. Sondyqtan onda ótirik, kólgirsý, artyq sóz bolmaidy. Jastar shubyrtyp kóp te jazbaidy, oiyna ne kelse, sony sol kúiinde syilaidy. Sony oqi otyryp, qazirgi jastardyń sanasynda ne bar ekenin bilesiń. Al, olar siz ben bizge hat jazyp jatyr. Ol qandai hat?
Jasy 17-den jańa asqan stýdentter oiy men kózqarasyn hatqa túsirip, ol jinaqtalyp kitap boldy. Qańtardyń 25-inde «Jambyl» jastar kitaphanasynda SDÝ ýniversitetiniń «Shabyt» qalamgerler klýbynan jaryq kórgen 5 kitap kópshilikke jol tartty. Kitap «SAMGA» baspasynda basylyp, KITAPAL dúkeninde satylyp jatyr.
Sonymen, jastar ne deidi? Olar shynaiy kirshiksiz sezimdi saǵynady ("Saǵyndym ǵoi"), ishke qonǵan asyl sózder men taza oilaryn syrtqy álemnen jasyrmaidy ("Jasyrmaimyn"). JOO tabaldyryǵyn attap, mamandyq tańdaǵan sátten bastap myna jalǵan ómirdiń syryna úńiledi ("Ómirdiń máni ne?"), jan-dúnieni tóńkerip, týlatqan, alysta qalǵan ata-ana, baýyrlaryna degen mahabbatty jyrlaidy ("Meni ózgertken mahabbat"). Sosyn pozitivti oilaryn qaǵazǵa túsirip jas ta bolsa óz túigenderimen bólisedi ("Men seni jaqsy kórem,Ómir"). Osy bes kitap jas qalamgerlerdi jazýshylyq álemniń esiginen kirgizip, árdaiym shabyt syilaityn boitumaryna ainalady desek artyq aitqanymyz emes.
Tanystyrylymǵa Ál-Farabi atyndaǵy QazUÝ, Abai atyndaǵy QazUPÝ, QyzPÝ, Asfendiiarov atyndaǵy meditsinalyq ýniversitet stýdentteri qatysyp, olar da «Shabyt» klýbymen birigip kitap shyǵarmaqqa kelisti. Ǵajap emes pe! Jaqsy bastamaǵa árdaiym sáttilik tileimiz. Jazar kóbeisin, qalamdaryń ushtala bersin, jas qalamgerler! Qazaqty álemge tanytatyn zańǵar jazýshy bolýlaryńdy asyǵa kútemiz.
Miras Kesebaev
